06 авг 2015 16:32Тоҷикистон / Иҷтимоӣ / Рӯ ба рӯ

Шаҳбол Мирзоев ҷуброни зарари модӣ ва маънавиро намегирад

Колегияи ҳарбии Додгоҳи олии Тоҷикистон қарори Додгоҳи ҳарбӣ дар мавриди пардохти 97265 сомонӣ зарари модӣ ва 20000 сомонӣ зарари маънавӣ ба сарбози латту кӯбшуда Шаҳбол Мирзоевро бекор кард.

Аз ташкилоти ҷамъиятии “Дафтари озодиҳои шаҳрвандӣ” ба “Озодагон” гуфтанд, Колегияи ҳарбии Суди олӣ имрӯз, 6 август дар пайи баррасии шикояти кассатсионии ҷавобгар қарори Додгоҳи ҳарбии гарнизони Душанберо бекор кард.

25 майи соли равон Зебуниссо Саидова, додраси Додгоҳи низомии гарнизони шаҳри Душанбеқарор кард, Сарраёсати қушунҳои сарҳадии Кумитаи давлатии амнияти миллӣ ба хонаводаи Шаҳбол Мирзоев, сарбози латту кӯбшудаи тоҷик 117 ҳазор сомонӣ ҷуброни зарари моддию маънавӣ пардохт кунад. Дар қарори хонум Саидова гуфта мешуд, Сарраёсат ба хонаводаи Шаҳбол 97 ҳазору 265 сомонию 37 дирам ҷуброни зарари моддӣ ва 20 ҳазор сомонӣ ҷуброни зарари маънавӣ пардохт кунад. Ин дар ҳолест, ки хонаводаи Шаҳбол Мирзоев аз Сарраёсати қушунҳои сарҳадии Кумитаи давлатии амнияти миллӣ 180 ҳазор сомонӣ ҷуброни зарари маънавӣ ва 97 ҳазору 265 сомонию 37 дирам ҷуброни зарари моддӣ талаб карда буд.

“6 августи соли 2015 Колегияи ҳарбии Додгоҳи олӣ шикояти кассатсионии ҷонибҳо ва эътирози шикоятии намояндагони додситони ҳарбии гарнизони Душанберо баррасӣ намуда, қарори Додгоҳи ҳарбиро бекор намуд”,-мегӯяд, “Дафтари озодиҳои шаҳрвандӣ”.

Ба гуфтаи манбаъ, акнун ин парвандаро дар Додгоҳи ҳарбии гарнизони Душанбе додраси дигар баррасӣ хоҳад кард.

Ин дар ҳолест, ки ба иттилои “Дафтари озодиҳои шаҳрвандӣ”, хонаводаи Шаҳбол Мирзоев феълан дар ҳолати бади молӣ қарор дошта, барои табобати ӯ маблағи кофӣ надоранд: “Онҳо ҳоло дар ноҳияи Ашт зиндагӣ мекунанд ва Шаҳболро барои табобат бояд Хуҷанд баранд. Дар гурдаи Шаҳбол санг пайдо шудааст ва барои гирифтани он бояд ҷарроҳӣ шавад”.

Шаҳбол Мирзоев, сокини деҳаи Понғози ноҳияи Ашт ва фориғуттаҳсили Донишгоҳи ҳуқуқ ва тиҷорати шаҳри Хуҷанд, соли 2013 довталабона ба хидмати низомӣ рафта, шоми 8 марти соли 2014 аз сӯи ҳамхидматаш дар қисми ҳарбии марзбонии 2620 мавриди латту кӯби шадид қарор гирифт. Додситонии низомии гарнизони шаҳри Душанбе баъд аз таҳқиқи ин қазия эълон кард, “гардани Шаҳбол Мирзоев дар натиҷаи маҷбуран гуштӣ гирондани ӯ бо кӯҳнасарбоз - Усмоналӣ Ғайратов шикастааст”.

Мӯҳр

Хабарҳои монанд: