30 июл 2015 09:27Оcиёи Марказӣ / Тоҷикистон

Даъвати Маматалиев аз вазорату идора ва соҳибкорон барои кумак ба Тоҷикистон

Абдураҳмон Маматалиев, муовини нахуствазири Қирғизистон аз омодагии кишвараш барои кумак ба ҳукумати Тоҷикистон дар мавриди рафъи хисороти офати табиии ахир хабар додааст.

Муовини нахуствазири Қирғизистон дар ҷаласаи кории рӯзи 29 июлаш аз масъулини ниҳодҳои зиррабти давлатии ин кишвар хостааст, масъалаи кумак ба сокинони осебдидаи Тоҷикистонро ҳал кунанд. Ӯ гуфтааст, “бо назардошти хисороти офати табиии ахир ба сокинони Тоҷикистон фикр мекунам, ҳама гуна кумак аз ҷониби мо дар ин вазъият барои ҳамсоякишварамон бисёр саривақтӣ хоҳад буд. Тавре ҳамаи мо медонем, ҳоло бо Тоҷикистон равобити хуби дӯстона дорему вақтҳои охир он боз ҳам тақвият меёбад”.

Муовини нахуствазири Қирғизистон изҳор доштааст, ҳоло ҳукумати Тоҷикистон барои рафъи хисороти офати табиӣ ба сӯзишворӣ, семент, арматур, лӯлаву сеткаҳои оҳанин, трансформатор ва масолеҳи дигари сохтмонӣ ниёз дорад: “Барои мо зарур аст, ки ин масъаларо ҳар чи зудтар дар асоси хоҳиши ҳамсоякишвар ҳал кунем”.

Маматалиев аз тамоми раҳбарони ниҳодҳои зиррабти кишвараш хостааст, ин масъаларо дар муддати се шабонарӯз ҳал кунанд ва Вазорати умури дохилии Қирғизистонро муваззаф кардааст, корвони мошинҳои ҳомили кумакҳои башардӯстона ба Тоҷикистонро ҳамроҳӣ кунанд. Муовини нахуствазири Қирғизистон афзуда, ӯ ба тамоми гузаргоҳҳои марзии кишвараш дастур додааст, то ҳангоми убури мошинҳои ҳомили кумак аз дигар давлатҳо ба Тоҷикистон монеа эҷод накунанду аз ҳама гуна иқдомҳои бюрократӣ худдорӣ кунанд.

Дар ин ҷаласа ба раҳбарони ниҳодҳои давлатии Қирғизистон дастур шудааст, то аз тоҷирон ва соҳибкорони қирғиз даъват кунанд, барои кумак ба сокинони зарардида аз офати табиӣ дар Тоҷикистон саҳм гузоранд.

Мӯҳр

Хабарҳои монанд: