Волидони Саъдӣ аз президент муҷозоти қотили “пуштдор”-и фарзандашонро талаб доранд
Волидони Саъдӣ Сатторови 25-сола, ки шаби 28-уми апрели соли равон дар тарабхонаи “Шаҳрисабз”, дар маркази шаҳри Душанбе аз зарби корд ба ҳалокат расида буд, аз Эмомалӣ Раҳмон, раисиҷумҳури Тоҷикистон хоҳиш доранд, ки тафтишоти қазияро зери назорати худ бигирад. Волидони ин ҷавони марҳум аз он нигаронанд, ки гӯиё қотили эҳтимолии фарзандашон аз оилаҳои бонуфузи Тоҷикистон аст ва дар гузашта низ аз ҷавобгарӣ барои чандин ҷиноятҳои вазнин халос шудааст.
Волидони Саъдӣ мегӯянд аз марги фарзандашон 8 рӯз сипарӣ шудааст, вале то ҳол ягон намояндаи мақомот аз дарашон надаромадааст.
Саид Сатторов, падари Саъдии марҳум, дар суҳбат бо “Озодагон” гуфт, “ҳамон шаб раҳматиро ба тарабхонаи “Шаҳрисабз” ба зодрӯзи як рафиқашон даъват намудаанд. Аз нақли нафароне, ки навори видеоии тарабхонаро тамошо кардаанд фаҳмидем, ки вақте як гуруҳ ҷавонон ҷанҷол мекунанд, писари ман онҳоро халос мекунад ва ҳамин вақт ду нафар аз дастонаш медоранду як нафари дигар аз таги китфаш ба дили ӯ кордча мезанад. Кормандони мақомот низ ҳамин навори видеоиро дидаанд ва дар даст доранд. Агар мақомот хоҳанд, ки ингуна қотилонро ба зудӣ дастгир мекунанд, зеро навори видеоиро дар даст доранд ва нафарони зиёде низ шоҳиди ҳодиса шудаанд.”
Падари Саъдӣ мегӯяд вақте хабари марги фарзандаш ба онҳо расидааст ва барои гирифтани ҷасади ӯ ба беморхонаи “Қарияи боло” рафтаанд: “Ҷасади фарзандамонро ба зудӣ ба мо надоданд. Аз ҳамон ҷо чанд рафиқи писарамонро бурда пурсуҷӯ кардаанд. Рафиқони писарамон мегӯянд, моро таҳдид карда гуфтанд, ки шумо бигӯед шабе, ки ҳамин ҳодиса рух дод дар дасти Саъдӣ писталет буд. Қотил аз таги дасташон гурехта мераваду мақомот нафарони бегуноҳро бурда, таҳдид карда, “ба даҳони онҳо гап мемонанд.” Мо ҳайрон мешавем, ки чаро мақомот нафаронеро бурда пурсуҷӯ кардаанд, ки аслан аз ин воқеа хабар надоштаанду ва дар ҷойи ҳодиса низ ҳузур надоштанд. Агар ҳадафи онҳо қотилро пайдо кардан мебуд, бояд рафта рафиқону наздикони қотилро мепурсиданд на рафиқони кушташударо.”
Замира Сатторова, модари Саъдӣ Сатторов дар суҳбат ба “Озодагон” гуфт, “бисёр аламовар аст, вақте фарзандатро дар пеши чашмонат мекушанд. Чанд соли ахир аст, ки ҷасади бисёре аз фарзандони тоҷикро аз Русия меоранд, аммо имрӯз фарзандонамонро дар пеши чашмамон мекушанду боз ҷасадашро ба осонӣ намедиҳанд. Вақте барои гирифтани ҷасади Саъдӣ рафтем фарзанди дигариямро дар як кунҷ шинонда пурсупос карда истодаанд. Ҳол он, ки ин писари дигариям ҳамон шаб аз хона набаромада буд. Чанд рафиқи дигарашро низ бурда пурсуҷӯ кардаанд.”
Холаи Замира мегӯяд, дар Тоҷикистон модароне, ки пораи ҷигарашонро аз даст додаанд, кам нестанд: “Бояд, ки ҳукуматдорони мо нисбати ин ҳодиса ҷиддӣ муносибат намуда, пеши роҳи ин гуна ҷавонони қотилу кордчазанро гиранд. То ин ки дар оянда хуни ягон ҷавонмарди дигарро нарезанд. Кӣ ба ӯ ҳақ додааст, ки як нафари бегуноҳро аз ҳаёт маҳрум созад. Писари ман то ба имрӯз ба касе бадӣ накарда буд”.
Падари Саъдӣ мегӯяд, ман аз президенти Тоҷикистон, Эмомалӣ Раҳмон хоҳиши онро дорам, ки ба мақомот супориши махсус диҳад, ки дар наздиктарин фурсат қотили писари моро дарёфт кунанд ва дар асоси қонун барои ҷиноятҳои содирнамудааш ҷазо бидиҳанд: “Агар имрӯз ӯро дастгир карда ҷазо надиҳанд фардо риштаи ҳайёти дигареро канда мекунад. Бигузор падару модари ҳамин қотилро низ бо ҳамин фарзанди тарбиянамудаашон ба ҷавобгарӣ кашанд, то ин ки ба волидони дигар намунаи ибрат шавад. Чаро як маротиба аз тариқи шабакаҳои телевизионҳои давлатӣ чеҳраи ин гуна қотилон нишон дода намешавад. Мо аз президент хоҳиш мекунем, ки дастур диҳад то ки қотили писарамонро дасгир намуда ба ҷавобгарӣ кашанд.”
Волидайни Саъдӣ мегӯянд сарусадоҳои зиёдеро дар мавриди қотили эҳтимолии фарзандашон мешунаванд, ки гӯиё аз оилаҳои бонуфуз асту аз ҷавобгарӣ барои чандин ҷиноятҳои қаблӣ низ халос шудааст. “Гуё падари қотили фарзандамон бо як мақоми давлатӣ ҳамкории зич доштааст ва фарзандаш ҳар коре, ки мехостааст мекардаст, вале мақомот нисбати ӯ ягон чораи ҷиддӣ намедидаанд. Ӯ пеш аз ин чанд нафари дигарро низ кордча задааст. Мо шунидем, ки ин одам се шиноснома ва ҳамчунин шаҳрвандии Афғонистонро низ доштааст. Мегӯянд ба хотире, ки мақомот ба ӯ барои ҷиноятҳои вазнинаш ҷазои сабуктар диҳад ба ӯ аз девонахона ҳуҷҷати махсус тайёр намуда будаанд. Ҳар рӯз як овозаи нав ба мо мерасад, бовар мекунед инҳоро шунида девона мешавем. Мегӯянд қотили фарзандамон худи ҳамон шаб ба Қирғизистон фирор кардааст. Мо ҳайрон мешавем, ки чигуна як қотил аз таги дасти мақомот фирор мекунаду, онҳо бехабар мемонанд. Мудоме, ки 8 рӯз гузаштааст, ҳанӯз ба мо хабар нарасидааст, ки мақомот қотилро дастгир кардаанд.” -мегӯяд падари Саъдӣ.
Дар ҳамин ҳол Маҳмадулло Асадуллоев, сухангӯи Вазорати умури дохилии Тоҷикистон, дар суҳбат бо хабаргузории “Озодагон” гуфт, айни ҳол бо иттиҳоми куштори Саъдӣ Сатторов чанд гумонбар боздошт шудаанд. Вале Асадуллоев ба хотири халал нарасондан ба раванди тафтишот аз ифшои номи боздоштшудагон худдорӣ карда, ваъда дод, ки рӯзҳои наздик тариқи хабаргузории “Озодагон” ҷузъиёти ин қазияро шарҳ хоҳад дод.
Ёдовар мешавем, ки шаби 28-уми апрели соли равон дар тарабхонаи «Шаҳрисабз»-и ноҳияи Исмоили Сомонӣ як нафар кушта шуда, як нафари дигар ҷароҳати ҷисмонӣ бардоштааст. Ба иттилои мақомот муноқиша байни 4 сокини пойтахт рух додааст ва як нафари онҳо бо истифода аз корд ду нафарро маҷруҳ мекунад, ки дар натиҷа 1 нафари онҳо дар ҷои ҳодиса ба ҳалокат мерасад ва дигарӣ бо ҷароҳати вазнин дар бемористон бистарӣ мешавад. Мӯҳр
Эзоҳ илова кунед
ХАБАРҲОИ ОХИРИН
Баҳси пурзӯр кардани ҳифзи сарҳади Тоҷикистону Афғонистон дар дидори Э.Раҳмон ва ҳайати парлумони Аврупо10:09Оғози фурӯши смартфонҳои iPhone 8 ва iPhone 8 Plus!09:49БО ЗАБОНИ ШЕЪР: Ман зи андешаи турконаи як ҳамватанам метарсам...15:34Чаро ҳукумат ҳамеша ба ТАЛКО имтиёз медиҳад?14:16“Шантаж”-и ҳамсар: Аз ҳаққи модарӣ даст накашӣ расвоят мекунам10:27Баҳси буҷа: Аз қарзи маош то қарзи хориҷӣ11:57Сарвазири Тоҷикистон бо Президенти Узбакистон мулоқот мекунад11:05Ҳимояти СММ аз cарбози тоҷики пайрави “Шоҳидони Яҳво”, ки либоси низомиро рад кард10:38АКС+ВИДЕО. Нахустин анҷумани маъюбони Тоҷикистон дар Душанбе11:51Маҷлис: Аз тағйироти кадрӣ то ваъдаи 80 мансабдор барои пулдиҳӣ аз кисаи худ15:46100 метр дуртар: Тамокукашӣ маҳдудтар шуд13:21Аз парвандаи Маҳмудов то муроҷиати ҷабрдидагони "7 бурҷ": Роҳкиро надорем (ВИДЕО)11:18Пешниҳоди журналисти тоҷик ба раҳбарони кишварҳои ҷаҳон: 2018-ро соли беяроқӣ эълон кунем!09:33Агентии зидди коррупсия гуфт, “Умед-88” ва Вазорати молия аз “Роғун” қарз гирифтаанд08:01Таърихи имрӯз: Мавлуд, ҷашн, санаҳои таърихӣ, дамои ҳаво, бозори арз07:44
АХБОРИ ҶОЛИБ
10:09, 04 ноябр 2017
ТАҚВИМ
| « Ноябр 2024 » | ||||||
|---|---|---|---|---|---|---|
| Душ | Сеш | Чор | Пан | Ҷум | Шан | Якш |
| 1 | 2 | 3 | ||||
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | |
