28 мар 2013 17:05Оcиёи Марказӣ / Тоҷикистон

Раҳмон ҳамкории Душанбеву Остонаро “намунавӣ” хонд

Нимаи дуюми имрӯз, 28-уми март, раисиҷумҳури Тоҷикистон, Эмомалӣ Раҳмон, вазири корҳои хориҷии Қазоқистон Ерлан Идрисовро, ки бо сафари расмӣ ба Тоҷикистон ташриф овардааст, ба ҳузур пазируфт.

Тавре аз дафтари матбуоти раисиҷумҳури Тоҷикистон хабар доданд, дар мулоқот масоили ҳамкории гуногунпаҳлӯи Тоҷикистону Қазоқистон баррасӣ шуд. Эмомалӣ Раҳмон ҳамкории Тоҷикистону Қазоқистонро “намунаи хуби ҳамкории созандаи минтақавӣ” номида, изҳори боварӣ намудааст, ки минбаъд робитаҳои дӯстонаи ду кишвар боз ҳам қавитар мегарданд.

Ерлан Идрисов ҳамроҳшавии Тоҷикистонро ба Созмони ҷаҳонии савдо ва дар шаҳри Душанбе баргузор шудани ҳамоиши вазирони корҳои хориҷии кишварҳои Гуфтугйи Осиё доир ба ҳамкориро нишонаи возеҳи болоравии обурӯю нуфузи ҷаҳонии Тоҷикистон номида, Эмомалӣ Раҳмон ва мардуми ҷумҳуриро бо дастовардҳои муҳими глобалӣ таҳният гуфтааст.

Зимни мулоқот зикр гардидааст, ки ҳаҷми гардиши молу маҳсулот миёни Тоҷикистону Қазоқистон дар соли 2012 ба зиёда аз 700 миллион доллари амрикоӣ расида, нисбат ба соли 2011 150% афзудааст. Ҳамзамон таъкид гардид, ки имкону захираҳо барои боз ҳам афзун намудани ин нишондод хеле зиёд аст. Дафтари матбуоти президенти Тоҷикистон мегӯяд, ба роҳ мондани ҳамкории созанда доир ба истифодаи босамари захираҳои обию энергетикии Тоҷикистон ва минтақа низ аз мавзӯъҳои муҳими суҳбат буд.

Доир ба беҳсозии фазои ҳуқуқӣ барои кор ва будубоши бемонеаи муҳоҷирони кории Тоҷикистон дар Қазоқистон ва ҳамчунин доир ба густариши робитаҳо дар соҳаҳои маориф, илму техника, фарҳанг ва ҷаҳонгардӣ табодули афкор сурат гирифтааст. Барои истифодаи имкониятҳои мавҷуда, фаъолияти муштараки мақомот, аз ҷумла Хазинаи сармоягузории мустақими Тоҷикистону Қазоқистон, зарур шумурда шуд.

Мӯҳр

Хабарҳои монанд: