Шаҳрванди фирории узбак дар Бишкек ғайб задааст

Шуҳрат Муҳсин, шаҳрванди фирори узбак, ки дар қасди тағйири сохти конститутсионии Узбакистон муттаҳам мешавад, чанд рӯз пеш дар Бишкек ғайб задааст.

Дар ин бора Анҷумани «Ҳифзи ҳуқуқи инсон дар Осиёи Марказӣ» (AHRCA) иттилоия пахш намуда, нопадид шудани Шуҳрат Муҳсинро кори дасти хадамоти махсуси Узбакистон гуфтааст.

Дар иттилоияи AHRCA, омадааст, рӯзи ҳаштум мешавад, Шуҳрат Муҳсин бедарак аст ва ба зангҳои телефонӣ посух намедиҳад. AHRCA дар мавриди ҷузъиёти нопадид шудани ин шаҳрванди фирории узбак менависад, ки “18-уми феврал ба телефонии ҳамроҳи Муҳсин нафаре занг мезанад. Баъдан ӯ аз манзили иҷорааш, воқеъ дар шаҳраки Аламедини ноҳияи Бишкек берун шуда, гуфтаст, ки зуд бармегардад. Дар он хона ҳамкасб ва ду фарзанди ноболиғаш қарор доштаанд. Ҳамсараш он замон дар роҳ ба сӯйи Бишкек будааст.”

Анҷумани «Ҳифзи ҳуқуқи инсон дар Осиёи Марказӣ» менависад, Муҳсини 29 сола дар шаҳри Хонободи Андиҷони Узбакистон ба воя расидааст: «Падари вай барои риояи оинҳои исломӣ дар қайди мақомоти ҳифзи ҳуқуқи Узбакистон буда, дар пайи таъқиби мақомот соли 2008 маҷбур мешавад барои мардикорӣ ба Русия биравад».

Дар ҳамин ҳол, соли 2008, вақте нозири минтақавӣ ва кормандони Хадамоти миллии амниятии Узбакистон зуд-зуд ба манзили Шуҳрат меоянд, ӯ низ тасмим мегирад, ки кишварашро тарк намояд. Ҳамроҳ бо модар ва ҳамсараш ба Қирғизистон рафта, баъдан, падараш низ бо онҳо ҳамроҳ мегардад ва дар якҷоягӣ ба намояндагии Раёсати комиссари олии СММ дар умури гурезаҳо дар Бишкек муроҷиат мекунанд.

Соли 2009 СММ, Шуҳрат Муҳсинро паноҳандаи иҷборӣ эътироф кард ва ӯ дар Қирғизистон ба сар бурда, мунтазири интиқол ба кишвари сеюм нишаст. Волидонаш аз тариқи Раёсати комиссари олии СММ дар умури гурезаҳо ба ИМА рафтаанд. Аммо барои қабули Муҳсин ИМА ду маротиба ҷавоби рад додааст.

Дар ҳамин ҳол сентябри соли 2009 муҳлати шиносномаи узбакии ӯ ба анҷом расида, маҷбур мешавад, ҷойи зиндагияшро дар Қирғизистон пинҳон намояд.

Муҳсинро дар ватанаш дар қасди барҳам задани сохти конститутсионӣ ва ҳамдастӣ бо Ҳаракати исломии Узбакистон муттаҳам мекунанд. Аммо ӯ дар суҳбатҳои қаблияш бо расонаҳо ҳама гуна иртибот бо созмонҳои мамнуъро рад кардааст. Мӯҳр