Ёвари котиби давлатии ИМА дар ҳузури Эмомалӣ Раҳмон

Масоили ҳамкории Тоҷикистон бо ИМА дар бахшҳои гуногун баррасӣ гардид.

---

Тавре ба «Озодагон » аз хадамоти матбуотии райисҷумҳури Тоҷикистон иттилоъ доданд, пас аз зӯҳри дирӯз дар робита ба ин мулоқоти президент Эмомалӣ Раҳмон бо  ёвари котиби давлатии Иёлоти Муттаҳидаи Амрико оид ба муборизаи байналмилалӣ бо маводи мухаддир ва ҳифзи тартиботи ҳуқуқӣ Вилям Браунфилд сурат пазируфт. Бино ба қавли манбаъ, таваҷҷуҳи асосӣ ба ҳамгироии муштарак дар мубориза бо терроризму ифротгароӣ, гардиши  ғайриқонунии маводи мухаддир ва мусоидат ба таҳкими ҳифзи сарҳади Тоҷикистону Афғонистон зоҳир гардид.
Дар нишасти мазкур аз сатҳ ва мазмуни ҳамкории сохторҳои қудратӣ ва мақомоти ҳифзи ҳуқуқу тартиботи  Тоҷикистону Амрико дар самти мубориза бо хатарҳои ҷаҳони муосир, ки аз ҷумла дар шакли омодасозии кадрҳо, машғулиятҳои муштарак ва расондани кӯмакҳои техникӣ сурат мегирад, изҳори қаноатмандӣ карда шуд.
Аз ду ҷониб таъкид гардид, ки дар мубориза бо истеҳсол ва гардиши ғайриқонунии маводи мухаддир Тоҷикистону Амрико бояд бо тамоми кишварҳои минтақаи Осиёи Марказӣ, Афғонистон ва Русия ҳамгироии зич  ба роҳ монанд. Бо қаноатмандӣ зикр гардид, ки дар натиҷаи амалӣ шудани тадбирҳои судманди муштарак дар Афғонистон, аз ҷумла несту нобуд кардани киштзорҳои растаниҳои нашъадор ва мубориза  бо қочоқчиён  вақтҳои охир гардиши маводи мухаддир рӯ ба коҳиш овардааст.{jathumbnail off} 
Мӯҳр