Боз сари як тоҷикро дар Русия буриданд

Ин ваҳшоният аз тарафи миллатгароёни рус бори саввум ба амал меояд

Таърихи 1 октябр ҳаногме дар Тоҷикистон таёрии дидор аз Путинро мардуми тоҷик доштанд ва умеди беҳтар шудани аҳволи муҳоҷиринро дар сар доштанд, хабари бе ному нишон шудани як шаҳрванди муҳоҷири тоҷикро аз дӯсти журналистам Талабшоҳ шунидам ва дуо мекардем, ки Худо кунаду таyсиҳат пайдо шавад, аммо…
Рӯзи 11 октаябр хабар расид, ки тани бе сари  Шарипов Аҳтамшо Юсуфовичро дар яке аз ҷангалҳои воқеъ дар шаҳри Пушкинои вилояти Маскав пайдо кардаанд.

Шарипов Аҳтамшо Юсуфович, зодаи ноҳияи Панҷ ҳамагӣ камтар аз 23 сол умр дошту барои хушии рӯзгору серии хонадон яку ним сол пеш ба муҳоҷират рафта. Тавре наздикони ӯ мегӯянд, дар хонадон писари ягона буд ва 5 хоҳараш соҳиби оилаанд ва модари танҳояшро ягона пуштибону нигаҳбону ноновар буд.

Тибқи гуфтаи шоҳидон рӯзи 28 сентябри соли ҷорӣ дар  пайи дарёфти нон ба як мавзеи шаҳраки "Дружба", ки дар наздикии шоҳроҳи Ярославл қарор дорад меравад. Мавриди зикр аст, ки ин мавзеъ яке аз мавзеъҳоест, ки мардуми муҳоҷири тоҷику узбаку қирғизу молдаван ҷамъ гашта интизори корфармоён менишинанд. Ба рости дидани ин манзара бозорҳои ғуломфурӯшии қарнҳои пешро мемонад. Ҳар як мардикори муҳоҷир аз субҳ то шом менишинанд то каддом хоҷае "хозяин"-е омада, бо кадом қиммате, ки мехоҳад онҳоро кор мегирад.


Муҳоҷирати сартосарӣ ва набудани ҷойи кори муносиб дар Ватан беш аз миллион нафар мардуми тоҷикро сарсони Русия кардааст ва ҳама сола беш аз 1000 мурдаи ҷавони тоҷикро савори тобут меоваранд, ки аксаран бо марги табиӣ нафавтидаанд. Бештари онҳо ё аз дасти тоҷикон ё аз дасти миллатгароёни рус кушта мешаванд.

Тавре солҳои ахир мушоҳида мешавад ваҳшиёна куштани тоҷикро ин касифони палид касб кардаанд. Лату кӯби тоҷики муҳоҷир корест, ки қариб ҳамарӯза рух медиҳад, аммо чунин ваҳшиёна куштану сар аз тан ҷудо кардан таҳқирест бар ҳар миллатеро ки набошад. Декабри соли 2008 нахустин шуда калакҳои рус Салоҳуддин Азизовро дар вилояти Маскав сар аз тан ҷудо карданд. Сару садое рузноманигорону бархе аз рӯшанфикрон дар расонаҳову нашрияҳо баланд кардан, вале дигар мақомот хомӯш буд. Соли гузашта  ҷасади сухтаву сари аз тан ҷудои Бахтиёр Расулови шахритусиро, ки ҳамагӣ 20 сол дошт ба Ватан оварданд.

Ин даҳшатафкании милатгароёни рус нисбат ба тоҷикон чӣ маънӣ дорад ва чаро ин дафъа ҳама об бар даҳон гирифтаанд. Тавре расонаҳо хабар додаанд, Хадамоти муҳоҷирати Тоҷикистон ва сафорати Тоҷикистон дарр Русия ин қазияро думболагирӣ доранд. Аммо суоли матраҳ ин аст, чаро парлумони Тоҷикистон ва дигар мақомот ҳанӯз хомӯшанд? Чаро аҳзоби сиёсии Тоҷикистон, ки ҳама доди миллату ватанхоҳӣ мезананд нисбат ба чунин бераҳмиҳо ва таҳқирҳо нисбати ҳаммиҳанонашон нафасҳо ба дарун кардаанд? Соли гузашта баъзе изҳоротҳои расмиву ғайри расмиро аз ҷониби мақомот ва аҳзоби сиёсӣ нисбати шаҳодати Бахтиёр Расулов шунидем, аммо имсол шояд як амри оддӣ ё одати нав шумурдаанд, ки то ҳанӯз касе садо баланд накардааст.

Агарчӣ аз қатли ваҳшиёнаи ин ҷавони тоҷик чанд рӯз паси сар шудааст, аммо васоити ахбори Русия дар ин бора чизе нагуфтааст ва гуфта бошад ҳам аз як ишорае беш нест. Аммо агар як муҳоҷири тоҷик каме пояшро каҷ ниҳад худи ҳамон рӯз сарахбори ҳама расонаҳои русӣ маҳз ҳамон хабар аст. "Таджик напал на..", "Таджикский мигрант украл дочку", ки ҳеч аҳамияти ҷиддие надоранд. Пас ин амал аз дасти кист ва киҳо дар ин кор даст доранд? Шовинизм имрӯз маразе гаштааст, ки қариб саросари русияро фаро гирифта ва аксар дар чеҳраи мардуми ғайрирус танҳо душмани худро мебинанд. Ҳатто дар байни сиёсатмадорон ва рӯзноманигорону дигар ақшори ин кишвар. Намешавад тамоми миллати русро гунаҳкор кард, вале лашкари беш аз 5 миллионнафараи калсарҳо ҳатман аз ҷониби касе идора мешавад ва борҳо ҳам таҳдиду таҳқирро нисбати тоҷикон аз забони чеҳраҳои машҳури ин кишвар шунидаем, ки мавзӯи дигар аст.

Пас чаро марги тоҷик барои хабарнигорони русу сиёсатмардони дохиливу хориҷи ин қадар бе қадр гаштааст?

Талабшоҳи Cалом, журналисти тоҷик ва яке аз наздикони Аҳтамшоҳи ғӯрамарг гуфт, ки "Ҷасади марҳумро ҳафтаи оянда ба кишвар интиқол хоҳанд дод". Ва боз як хонадони тоҷик иди Қурбонро дар мотами писари қубоншудааш аз дасти қотилони миллатгаро "ид" хоҳад кард. Ҳазорон модарони чашминтизор  дар роҳи ҷигарбандони хеш низ қалбҳояшон пурхуну ҷигарҳояшон пора хоҳад шуд. Инчунин рӯз мотами танҳо як модар не,  балки мотами ҳама мардуми тоҷик аст, ки ҳар кадоме як пораи ҷигаре дар муҳоҷират дорад ва ҳама бори рӯзгорро маҳз онҳо мекашанд. Ин гуна таҳқир низ таҳқири як миллат аст на танҳо аз модару наздикони шаҳид Аҳтамшо.

Мардуми тоҷик танҳо ба гуфтани як ҳарф зӯру тавон дорад: "Худо биёмурзадат Аҳтамшои азиз". Аммо сиёсатмардону масъулини мо онҳое, ки ба як ишорат тамоми шартҳои Русияро пазируфтанд, дар ҷавоб чӣ мегуфта бошанд?

Аъзамшоҳ ҚӮҚАНШОҲ

Мӯҳр