25-уми декабр- рӯзи ҳуҷум болои Эрон?

Васоити ахбори оммаи Бритониё хабарҳоеро дар мавриди санаи дақиқи оғози ҳамлаи Исроил алайҳи Эрон нашр кардаанд. Таври маълум, Исроил дар паноҳи ИМА-ву НАТО бо баҳонаи бунёди маводи ҳастаӣ аз ҷониби Эрон, муддатест ки ҳавои ҷанг бо ин кишвари исломиро дорад. Ҳарчанд мамолики исломӣ ба ин қазия мудохила ҳанӯз мудохила накардаанд ва пуштибонии худро аз Теҳрон эълом надоштаанд, аммо гумони ғолиб бар он аст, ки дар ҳолати зарурӣ ва ҳуҷуми Исроил болои Эрон, рӯшан аст, ки давлати исломӣ танҳо нахоҳад монд.Ба иттилои манбаъҳои хабарии Қувайт, Эрону Сурия нақшаи мубориза зидди артиши хоричиро аллакай тарҳрезӣ намудаанд.

Дар ҳамин ҳол, яке аз кишварҳои асосии иттифоқчиён Туркия ба ҳисоб меравад, ки он ҷо таҷҳизоту техникаҳои ҳарбии Амрико мутақар шудаанд. Бояд гуфт, ки фармондеҳи қувваҳои ҳавоии Эрон генерал Амиралӣ Ҳоҷизода ошкоро сухан карда, иброз дошта буд, ки дар сурати камтарин хатари ҳуҷум мавзеҳои ҳарбии НАТО-ро дар Туркия  ракетаборон хоҳанд кард. Оқои Ҳоҷизода мегуфт, он чӣ, ки Амрико мегӯяд, ки ин мавзеъҳоро НАТО гирифтааст, дурӯғи маҳз аст: «Сионистҳо дар пасманзари ИМА амалиёт пиёда кардан доранд. Вашингтон бошад фаъолияти ҷангиро дар паноҳи НАТО ба анҷом мерасонад. Аммо мардуми турк аз ин амалҳои онҳо ба хубӣ огаҳӣ доранд ва шояд аз он ҷилавгирӣ намоянд. Агар худое накарда, ҷанг бар зидди Эрон оғоз гардад, дар ин сурат ҳатман Эрону Ироқ ва Сурия ба Туркия ҳамла хоҳанд кард». Инчунин, ҳуҷум ба халиҷи Форс бо истифода аз киштиҳои ҷангӣ, Ҳизбуллоҳ ва дигар тарафдорони Эрон дар Баҳрайн, Қатар ва мамолики Аморати Араб ҳуҷум ба базаҳои амрикоӣ хоҳанд намуд.

Эрон танҳо нахоҳад монд

Масъулини хадамоти вижаи Эрон дар Афғонистон қодиранд, «шербачаҳо»-и ин миллати ҷангзадаро алайҳи нерӯҳои НАТО бархезонанд ва зарбаи марговаре ба эшон зананд. Дар шарқи баҳри Миёназамин Ҳизбуллоҳ метавонад ҳукуматро таҳти контроли худ бигирад ва ҳар лаҳза зарбаҳои ҷонкоҳ ба нуқтаҳои он ҷо фаъолбудаи НАТО занад.  Дар Навори Ғазза бошад, Ҳаммос хоки Исроилро зери бомбаборон қарор медиҳад ва дар ин маврид артиши Сурия ҳам ба кӯмак  мерасад. Тавре маълум мешавад, Исроилу Амрико аз ин нияти дар сардоштаашон бурд нахоҳанд кард. Бе ягон муболиға метавон ҳадс зад, ки «ҷанг»-и Исроил бо Эрон иттифоқиву иттиҳодии мусалмонҳоро пешорӯ меорад ва дар якҷоягӣ зарбаи мудҳишу ҷонкоҳ ба Телавив, чӣ Исроилу чӣ Амрико ва чӣ блокчиёни НАТО бошанд ҳам хоҳанд зад. Покистон ҳам, агарчӣ дар ин даргириҳо мавқеаш то ҳол норӯшан аст, аз ИМА талаб кардаст то базаҳои ҳарбиашро тамоман аз ҳудуди ин давлат берун кунад. Бо берун рафтани базаҳои ҳарбии Амрико аз Покистон, базаҳои дигари ҳарбии он дар Афғонистон бе таъмини лавозимоти ҳарбиву ва низ хӯрокворӣ мемонад.

Аждаҳои сурх «хоб» намеравад

Ҳамин аст, ки Амрико кӯшиши дар мамлакатҳои Осиёи Марказӣ  дарёфти шарикони стратегиро дорад. Охири моҳи ноябр фармондеҳи  қӯшунҳои пиёдагарди ИМА, генерал-лейтенант Винсент Брукс ба ҷумҳурии Ӯзбакистон сафар карда, аз нақшаи кӯчондан ва ҷо ба ҷо гузории техникаҳои ҷангии ИМА дар кишварҳои Осиёи Марказӣ эълом дошаааст. Дасти кам 3-давлат: Ӯзбакистон, Туркманистон ва Қирғизистон дар ин маврид аллакай бо Вашингтон ба мувофиқа расидаанд. Эҳтимоле ҷой дорад, ки Тоҷикистону Қазоқистон низ бо ИМА ба мувофиқа оянд. Аз ин хотир, Русия нигаронии сахт аз он дорад, ки ин кишварҳо баъди соли 2014-ум соҳиби аслиҳаи ҳарбӣ мегарданд. Гап сари он меравад, ки баъдан дигар Русия дар мавриди аслиҳаи ҳарбӣ  ва шарики стратегӣ мақомашро барои ин давлатҳо аз даст хоҳад дод. Бе ин ҳам, атрофи Русия аллакай аз ракету дигар аслиҳаҳои ҷангии Амрикову НАТО пур шудааст ва гумон меравад, ки рӯзе не рӯзе, он болои Руси Кабир фурӯ хоҳад рехт. Кремл ҳам аз ин пайомад изҳори нигаронӣ дорад, аммо Вашингтон ҳеч ба эътирозҳои Маскав баҳри бардоштани системаи муҳофизати зиддимушакӣ (ПРО, противоракетноая оборона) гӯш намекунад ва мушакҳои ҷангиашро дар мамолики ғарб ҷогир мекунад.

Владимир Путин, нахуствазири феълӣ ва номзад ба мақоми президент Русия, рӯзи 8-уми декабр гуфт, мо бояд истиқлолият ва озодии Русияро муҳофизат намоем ва моро зарур аст, лоиҳаи ҳифзи кишварамонро аз давлатҳои бегона таҳия ва омода созем. Яъне, Кремл кайҳо хатарро аз ҷониби НАТО ва Амрико ҳис кардааст ва дар мавриди ҷанг бар зидди Эрон, ҳатман мавқеашро, агарчӣ ғайрихоҳиш ҳам бошад, ҷониби Теҳрон хоҳад кашид.Чини бузург ҳам аз қазияҳои болои кишварҳои шарқ фурӯрезии Амрикову НАТО изҳори норозигӣ мекунад.Ху Тсзинтао, раҳбари Хитой ҳам даҳаи аввали ҳамин моҳ ба ҳарбиёни флоти баҳрии Чин барои ба ҷанг тайёр будан  фармони махсус додааст.     Гузашта аз ин, Хитой ва Ҳиндустон, 2-мамлакати пешрафтаву сераҳолитарини дунё, харидорони асосии нафти Эрон маҳсуб мешаванд. Ин маънои онро дорад, ки ҳар ҳаракати ҷангии Амрико алайҳи Эрон хатар ба бехатарии энержии Пекинро дорад. Аз ин хотир, Чин хоҳу ноҳоҳ дар гирудорҳо ҳатман шарики Эрон хоҳад гашт. Тибқи иттилои ВАО-и Бритониё, санаи то ҳанӯз «номаълум»-и ҷанг алайҳи Эрон ошкор гардидаст. Исроил эълом доштааст, ки дар рӯзи мавлуди католикӣ- 25-уми декабр болои Эрон ҳуҷум хоҳад кард…

Аслиддин Достиев