Ҷаласаи Шӯрои МН дар парлумони Тоҷикистон

Имрӯз, 28-уми январ, таҳти раёсати Шукурҷон Зуҳуров ҷаласаи навбатии Шӯрои Маҷлиси намояндагон баргузор гардид.

Тавре аз хадамоти матбуотии палатаи поёнии парлумони кишвар ба Озодагон иттилоъ доданд, дар нишасти мазкур як қатор масъалаҳо, аз қабили лоиҳаи қонунҳои ҷумҳурии Тоҷикистон «Дар бораи танзими давлатии истеҳсол ва муомилоти спирти этилӣ, машрубот ва маҳсулоти спиртдор», «Дар бораи истифодаи мошинҳои назоратӣ хазинавии дорои хотираи фискалӣ», «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи фаъолияти китобдорӣ», «Оид ба ворид намудани тағйирот ба Кодекси мурофиавии ҷиноятии Ҷумҳурии Тоҷикистон» ва дигар масъалаҳо мавриди баррасии аъзои Шӯро қарор гирифтанд.

Манбаъ афзуд, раиси кумитаи МН оид ба энергетика, саноат, сохтмон ва коммуникатсия Амир Катаев оиди масъалаи якуми рӯзнома баромад намуда, иброз намуд, ки лоиҳаи Қонуни Ҷумҳурии Тоҷикистон «Дар бораи танзими давлатии истеҳсол ва муомилоти спирти этилӣ, машрубот ва маҳсулоти спиртдор» бо мақсади аз байн бурдани мухолифати байни меъёрҳои қонунҳои амалкунанда ва мутобиқгардонии он ба меъёрҳои қонунҳои Ҷумҳурии Тоҷикистон «Дар бораи санадҳои меъёрии ҳуқуқӣ», «Дар бораи забони давлатии Ҷумҳурии Тоҷикистон» ва ба талаботҳои Созмони Умумиҷаҳонии Савдо, инчунин ҷиҳати танзими давлатии истеҳсол ва муомилоти спирти этилӣ, машрубот ва маҳсулоти спиртдор, ҳифзи саломатӣ, ҳуқуқу манфиатҳои қонунии шаҳрвандон ва таъмини бехатарии маҳсулот ва риояи меъёру қоидаҳо ҳангоми истеҳсоли онҳо таҳия карда шудааст.  

Ҳамчунин, зимни баромади хеш аъзои Шӯро зикр намуданд, ки мақсади лоиҳаи Қонуни Ҷумҳурии Тоҷикистон «Дар бораи истифодаи мошинҳои назоратӣ хазинавии дорои хотираи фискалӣ», пеш аз ҳама, таъмин намудани асосҳои ҳуқуқӣ ва иқтисодии танзими истифодаи мошинҳои назоратӣ-хазинавии дорои хотираи фискалӣ дар муомилотҳои пулӣ ва хизматрасонӣ ба аҳолӣ буда, ҳамзамон қоидаву расмиёти ягонаи вобаста ба истифодаи ин мошинҳоро муайян мекунад.  
Мӯҳр