Дарёфти туфангчаи Макаров аз сокини шаҳри Душанбе

Дар пайи амалиёти кормандони Агентии назорати маводи нашъаовари назди президенти  Тоҷикистон миқдори зиёди маводи нашъаовар аз муомилоти ғайриқонунӣ гирифта шуд.

Бобоҷони Шафеъ, сухангӯи  агентии мазкур ба Озодагон иттилоъ  дод, ки муддати дурудароз як сокини 34 солаи пойтахт, ки гумон мерафт ба тиҷорат ва интиқоли мухаддирот сарукор дорад ва мавриди пайгирӣ қарор дошт, рӯзи ниҳоии амалиёт дар ҷараёни кофтуков аз маҳалли истиқоматии ӯ 22 бастаи дорои маводи хамирмонанди дорои бӯи махсус ошкор ва мусодира гардид.

Гуфта мешавад, тибқи хулосаи шӯъбаи ташхиси судии агентӣ маводи мусодирашуда воситаи нашъаовари афюн буда, вазнаш ҳудуди 10 килоро ташкил медиҳад.

Манбаъ мегӯяд, зимни роҳандозии чорабинии дигари фаврӣ-ҷустуҷӯӣ дар хонаи боздоштшуда силоҳи оташфишон, туфангчаи тамғаи Макаров бо тирҳояш кашф ва мусодира карда шуд: “Боздоштшуда  айни замон дар тафқифгоҳи муваққатии агентӣ нигаҳдорӣ мешавад”.

Кормандони агентӣ алоқамандии ӯ бо дигар навъи ҷиноятҳо, манбаи ба даст овардани туфангча ва истифодаи он барои содир намудани ҷурму ҷиноятҳои дигарро тафтишу пайгирӣ доранд.

Мӯҳр