Аз ҷавобгарӣ озод шудани яроқсупорон дар Хоруғ

Аз 25-уми июл то 20-уми декабри соли равон аз тарафи сокинони маҳаллаҳои Заводи нон, Хоруғи боло, «УПД»-и Хоруғ ва деҳаи Поршневи ноҳияи Шуғнон ҳамагӣ 325 адад яроқи оташфишон ва миқдори зиёди лавозимот ва дигар муҳимоти ҷангӣ ба таври ихтиёрӣ супорида шуд.

Бино ба иттилои Прокуратураи генералии Тоҷикистон аз ин миқдор яроқҳои оташфишонӣ-105 ададро автоматҳои Калашникови гуногунтамға, 5 адад пулемёти Калашников, 1 адад ДШК, 7 адад аслиҳаи вазнин, аз ҷумла 1 адад миномёти қутраш 82 мм, 7 адад гулулапарто (гранатамёт), 3 адад милтиқи мерганӣ (снайперӣ), 118 адад таппончаҳои гуногун, аз ин 106 адад таппончаҳои тамғаи Макаров, 6 адад милтиқи суфтамили ИЖ, 43 адад милтиқи «Карабин», 31 адад милтиқи ТОЗ-8, , 22000 адад тирҳои гуногун, 159 адад снарядҳои гуногун, 3 адад минаҳо, 190 адад норинҷакҳо (гранатаҳо), 206 адад запал, 8 адад тротил, 229 адад ВОГ, 800 гр. тротил, 80 кг. моддаи худсози тарканда ва дигар муҳимоти ҷангиро ташкил медиҳанд.

Гуфта мешавад, супридани яроқҳо дар натиҷаи андешидани чораҳои фаврӣ-тафтишотӣ ва корҳои фаҳмондадиҳӣ аз ҷониби мақомоти корҳои дохилӣ, амният ва дигар мақомоти ҳокимияти давлатӣ дар ҳамкорӣ бо раисони маҳаллаҳо ва аҳолии шаҳри Хоруғ ба амал омадааст.

Роҷеъ ба ҳолатҳои мазкур парвандаҳои ҷиноятӣ оғоз карда шуда, аз ҷониби гурӯҳи тафтишотии Прокуратураи генералӣ дар якҷоягӣ бо парвандаи ҷиноятӣ оид ба ҷиноятҳо ва воқеаҳои моҳҳои июл ва августи соли 2012 дар Хоруғ мавриди тафтиш қарор дода шуданд.

Ҳамчунин манбаъ илова намудааст, ки 21-уми декабри соли равон бо қарори роҳбари ин гурӯҳи тафтишотӣ ва розигии муовини якуми Прокурори генералии  Тоҷикистон тибқи  моддаи 195 КҶ  Тоҷикистон шахсоне, ки яроқҳои оташфишон ва лавозимоти ҷангиро ихтиёрӣ супурдаанд, аз ҷавобгарии ҷиноятӣ озод карда шудаанд.
Мӯҳр