Дар Шаҳринав баҳисобгирии муҳоҷирон баррасӣ шуд

Масъулини Хадамоти муҳоҷирати Тоҷикистон бо мақсади тақвияти корҳои фаҳмондадиҳию иттилоотӣ ва танзими раванди муҳоҷирати меҳнатӣ  бо раисони ҷамоат, директорони мактаб, ташкилотҳои ҷамъиятӣ, инчунин бо фаъолон ва шахсони масъули ноҳияи Шаҳринав мулоқот намуданд.

Абдуллоҳ Қодирӣ, сухангӯи ин хадамот ба Озодагон иттилоъ дод, ки дар вохӯрӣ масоили шиносоӣ бо вазъи муҳоҷирони меҳнатии тоҷик дар хориҷи кишвар, пешгирии муҳоҷирати ғайриқонунӣ, баҳисобгирии муҳоҷирон-шаҳрвандони Тоҷикистон, ҳамкорӣ бо ҷамъияти муҳоҷирон ва саҳми онҳо дар рушди ноҳияҳо, депортатсия(ихроҷ), масъалаи миёнаравон ва қаллобӣ дар бозори меҳнати Русия, муҳлати тамдиди бақайдгирӣ аз 7 рӯз ба 15 рӯз, ичозати кор аз 1 сол то ба 3 сол баррасӣ шуд.

Гуфта мешавад, назорати фаъолияти муҳоҷирони меҳнатии хориҷа дар Тоҷикистон, сатҳи забондонии муҳоҷирони меҳнатӣ, касбомӯзӣ, одобу русум, таърих ва фарҳанги кишварҳои қабулкунанда ва дигар масъалаҳое, ки ба мавзӯи муҳоҷирати меҳнатӣ марбутанд, аз сӯи кормандони хадамот дар ноҳияи Шаҳринав мавриди муҳокима ва гуфтугӯ қарор гирифтанд.

Манбаъ мегӯяд, миёни масъулини хадамот ва бошандагони ноҳияи мазкур саволу ҷавоб дар мавриди  касбомӯзӣ ва омӯзиши забонҳои хориҷӣ, ичозати кор, тарзи гирифтани патент, депортатсия, назорати дақиқи тамоми сохторҳо ҳангоми сафари ноболиғон ба хориҷи кишвар дар фурӯдгоҳҳо, роҳи оҳан ва гузаргоҳҳои сарҳадӣ, таъсиси шӯъбаи Хадамоти муҳоҷират дар  Шаҳринав, кӯмак ва мусоидат намудани шаҳрвандон ҳангоми убури сарҳадоти кишварҳои ИДМ бо қатораҳо, ташхиси тиббии муҳоҷирон пеш аз сафар ва баъд аз он ва тамдиди мӯҳлати бақайдгирӣ, сурат гирифт.

Мӯҳр