Баргузории давраи омӯзишӣ оид ба СҶТ

Дар шаҳри Душанбе давраи омӯзишии дурӯза дар мавзӯъи “Хадамоти тиҷоратӣ дар чаҳорчӯбаи вуруд ба Созмони ҷаҳонии тиҷорат: «Рушди марбут ба иттилооти тиҷоратӣ ва пуштибонӣ аз соҳибкорӣ» оғоз шуд.

Тавре ба Озодагон аз Маркази байнулмилалии тиҷорат хабар доданд, дар тренинг кормандон ва намояндагони доираҳои тиҷоратии Тоҷикистон ва ҳамчунин Палатаи савдо ва саноати Тоҷикистон иштирок мекунанд. Ин нишаст дар чаҳорчӯбаи лоиҳаи «Иҷрои талаботи СҶТ ва огоҳии доираҳои тиҷоратӣ аз шароити узвият ба он» сурат мегирад. Лоиҳаи мазкур аз ҷониби Идораи давлатии Швейтсария дар умури иқтисод (СЕКО) маблағгузорӣ мешавад ва онро Маркази байнулмилалии тиҷорат (МБТ) амалӣ менамояд.

Ҳадаф аз баргузории давраи омӯзишии мазкур боло бурдани сатҳи дониш ва фаҳмиши бахши хусусии Тоҷикистон аз манфиату чолишҳо ва пайомади вуруд ба СҶТ, ва нақши доираҳои тиҷоратӣ дар пуштибонӣ аз соҳибкорӣ ва хадамоти марбут ба иттилооти тиҷоратӣ мебошад. Иштирокдорони давра, ҳамзамон, имкон доранд, то бо абзорҳои МБТ оид ба таҳлили тиҷорат ва манбаъҳои иттилооти тиҷоратӣ чиҳати ҷустуҷӯҳои бозорёбӣ шинос шаванд. Давраи омӯзишии мазкурро ду мушовири МБТ – бону Фамке Шаап, мушовир оид ба соҳибкорӣ ва сиёсатҳои тиҷоратӣ ва хонум Медея Метревели, мушовир оид ба хадамоти иттилооти тиҷоратӣ раҳбарӣ мекунанд.

Мӯҳр