Захмиёнро аз Хоруғ ба Душанбе оварданд. Амалиёт идома дорад

Дар ҳоли ҳозир ба муоинаи захмиён машғулем, тайи се соат беш аз 10 низомии ҷароҳатбардоштаро оварданд.

Аснои сӯҳбат бо Озодагон як пизишк, ки аз ифшои номаш худдорӣ мешавад, дар беморхонаи мавсум ба Қарияи Боло гуфт: «Аз соати 12-и имрӯз ба маркази миллии табобат овардани захмиён аз шаҳри Хоруғ сар шуд. Онҳоро тариқи чархбол аз Бадахшон меоранд ва дар бозгашт аз ин ҷо шояд неруи изофаи низомӣ мебаранд».

Ҳамзамон, дар фурудгоҳи ҳарбии Айнӣ ҳолати фуруд омадан ва ба ҳаво хестани чархболҳои низомӣ зиёд ба мушоҳида мерасад, тахмин зада мешавад, ки ин ба ҳодисаи амалиёти низомӣ дар Хоруғ рабт дорад.

Ёдрас менамоем, дар амалиёти махсус, ки алъон алайҳи Толиб Айёмбеков ва гурӯҳи ӯ дар Хоруғ идома дорад, 9 нафар низомиёни мақомоти қудратии Тоҷикистон ба ҳалокат расида, 25 тани дигар ҷароҳатҳои вазнин бардоштаанд.Ҷониби дигар низ талафоти ҷонӣ додааст, аммо шумораи он дақиқ нест. Дар ин бора як  шоҳиди айнӣ тариқи телефони моҳвораӣ (спутниковий связ) ба бахши русии ВВС иттилоъ додааст.

Айни замон амалиёти муштараки ВКД, ВМ ва КДАМ-у ва ОМОН алайҳи қотилони генерал Абдулло Назаров дар Хоруғ идома дорад
Мӯҳр