Даргузашти профессор Мансур Бобохонов дар Душанбе

Мансур Бобохонов, доктори улуми таърих пас аз бемории тӯлонӣ дар Душанбе аз дунё даргузашт.

Мансур Бобохонов 81 сол дошт ва бештари умри хешро сарфи пажӯҳишу таҳқиқ намуд. Дар лаҳзаҳои беморӣ ва рӯзҳои ахири ҳаёти марҳум хешовандону пайвандон ва ҷумла фарзандону наберагонаш дар сари болини ӯ қарор доштанд.
Бобохонов раҳбарии маркази илмиву таҳқиқотии тоҷикон ва форсизабонони ҷаҳонро дар назди донишгоҳи миллии Тоҷикистон ба ӯҳда дошта, чанд таҳқиқоти ахири худро ба мавзӯи  ҳаёт ва фаъолияти  тоҷикони бурунмарзӣ бахшидааст.
Мансур Бобохонов 28 августи соли 1931 дар ноҳияи Конибодоми вилояти Ленинобод (ҳоло Суғд) таваллуд шуда, соли 1953 факултаи таъриху филологияи УДТ-ро хатм кардааст.  Солҳои 1965 то 1972 декани факултаи таърих ва филологияи ДДТ будааст. Як соли дигар ба ҳайси профессори кафедраи таърихи Донишгоҳи Славянии Тоҷикистон фаъолият дошт. То соли 2001 дар ҳамин донишгоҳ раҳбарии факултаи таъриху ҳуқуқ ва равобити байналмилалиро низ ба зимма дошт.
Мансур Бобохонов падари журналист ва муассиси гурӯҳи расонаҳои «Азия Плюс» аст, ки ин расона дар фазои иттилоотии Тоҷикистон тайи 15 соли ахир нақши босазо дорад.

Аз идора: Озодагон аз даргузашти устод Мансур Бобохонов андӯҳгин буда, ба наздикону пайвандони эшон таслият баён мекунад. Ҷойи марҳум ҷаннат ва рӯҳаш шод бод.    
Мӯҳр