SOS:Афзоиш ёфтани фавти одамон дар ҷои кор

Ҳодисаҳои нохуш дар ҷои кор, ки боиси марги корманд гардидаанд, дар нимсолаи ввали соли ҷорӣ дар Тоҷикистон нисбат ба ҳамин давраи соли гузашта се маротиба афзоиш ёфтаанд.

Аз моҳи январ то июн дар истеҳсолот  9 ҳодисаи нохуш рӯй додааст, ки дар паи онҳо 11 нафар ҳалок гардида, 3 нафар ҷароҳати ҷисмонӣ бардоштанд.
Исроил Алямов, муовини аввали Саридораи назорати давлатии бехатарии корҳо дар саноат ва соҳаи кӯҳкории назди ҳукумати Тоҷикистон яке аз сабабҳои афзоиши фавт дар ҷои корро зиёд гардидани ҳаҷми корҳо мегӯяд. Алямов  сабаби дигари зиёд сар задани ҳодисаҳои нохушро, нарасидани нозирон дар минтақаҳои корӣ ном бурд: «Дар саридораи мо ҳам як қатор мушкилот ҷой дорад. Дар ҳоли зиёд будани ҳаҷми кор ва иншооти зерназоратӣ шумораи ками кормандон, ки ҳамагӣ 2-3 нафарӣ ҳастанд, имкон намедиҳад, то корхонаю иншоот сари вақт  аз назорат  гузаранд. Ҳамчунин ба саридора як ташхисгоҳи сайёр намерасад».  
Алямов ҷиҳати беҳтар намудани фаъолияти Саридораи назорати бехатарӣ ва  пешгирии ҳодисаҳои нохушу садама дар истеҳсолот, ҷудо намудани 10 воҳидҳои кории иловагӣ ва 150 ҳазор сомонӣ барои хариди ташхисгоҳи сайёр зарур медонад, ки бояд Вазорати молия амалӣ кунад.

Мӯҳр