Ҳамкории иқтисодӣ-тиҷоратӣ ва сармоягузории Тоҷикистону Чин баррасӣ шуд

Нимаи дуюми имрӯз Эмомалӣ Раҳмон, райисҷумҳури Тоҷикистон бо Вэн Ҷябао, сарвазири Шӯрои давлатии ҷумҳурии мардумии Чин мулоқот кард.

Дар мулоқот масоили ҳамкории иқтисодӣ-тиҷоратӣ ва сармоягузории ду кишвар баррасӣ шуд. Тибқи иттилои хадамоти матбуотии президенти Тоҷикистон Вэн Ҷябао изҳор доштааст, ки ҳукумати кишвараш барои тадбиқи амалии тавофуқоти имрӯза ва қаблии миёни ду кишвар имкону захираҳои заруриро сафарбар менамояд.
«Эмомалӣ Раҳмон ба ҳукумати Хитой барои дастгирии пайваста аз рушди босуботи кишвари мо арзи сипос намуда, таъкид дошт, ки ҳамкории гуногунпаҳлуи Тоҷикистону Чин, хусусан дар тадбиқи лоиҳаҳои бузургҳаҷми зербиноӣ ба нафъи кулли минтақа хизмат мекунад»,-афзуд манбаъ.
Аз ин пештар Эмомалӣ Раҳмон дар шаҳри Пекин бо роҳбарони як қатор ширкатҳои бонуфузи Чин мулоқот кард. Зимни сӯҳбатҳо таваҷҷӯҳи бештар ба сохтмони хатти 500 киловолтаи интиқоли нерӯи барқи Оби гарм - Душанбе ва Маркази барқу гармидиҳии Душанбе-2 зоҳир гардид. Таъкид гардид, ки лоиҳаи сохтмони хатти 500 киловолтаи интиқоли нерӯи барқи Оби гарм - Душанбе баъди омӯзиши дақиқи комиссияи ҳукуматии Тоҷикистон барои маблағгузорӣ ва оғози татбиқ пешниҳод карда мешавад.
Сохтмони Маркази барқу гармидиҳии Душанбе-2 бошад, тибқи тавофуқоти дар сатҳи олии сиёсӣ ҳосилшуда бояд тезонда шуда, дар зарфи як соли оянда ба поён расонда шавад.
Дар мулоқот бо раиси ширкати Ҳенан Ҷинҷиан Силверсид ЛИ ЧАО масоили ҳамкорӣ дар бахши зироаткорӣ баррасӣ шуд. Тавре зикр гардид, ҳоло ин ширкат дар ноҳияҳои Ёвон ва Ҷалолиддини Румии вилояти Хатлон дар 600 га замини корами обӣ пахта ва сабзавоту полезӣ кишт намуда, истифодаи технологияҳои пешқадами каммасраф ва серҳосили кишоварзиро ба роҳ мемонад.
Дар заминҳои кишти ин ширкат беш аз 40 нафар мутахассисони кишоварзӣ ва деҳқонони Тоҷикистон машғули кор ва омӯзиши таҷрибаи ғании ҳамкасбони чинии худ мебошанд.
Дар мулоқот бо Директори генералии ширкати сохтмони роҳу пулҳои Чин (Чайна Роуд энд Бриҷ Корпорэйшн) Вэн Ган масоили вобаста ба татбиқи босамари лоиҳаҳои роҳсозӣ дар Тоҷикистон баррасӣ шуд.
Эмомалӣ Раҳмон ба фаъолияти ин ширкат доир ба сохтмон ва навсозии роҳҳои мошингарди Тоҷикистон ба мисли Душанбе-Хуҷанд-Чанок бо нақби Шаҳристон, қисмати Душанбе-Данғараи шоҳроҳи Душанбе-Кӯлоб-Хорӯғ-Кулма- Қароқурум бо нақби Чормағзак баҳои баланд дода, изҳори боварӣ намуд, ки шоҳроҳи Душанбе-Турсунзода низ бо сифат ва суръати баланд дар муҳлати муайяншуда навсозӣ мешавад.
Мӯҳр