Дар Душанбе аъзои як гурӯҳи муташаккили ҷиноиро дастгир карданд

Зимни як амалиёти кормандони мақомоти ҳифзи ҳуқуқ паноҳгоҳи гурӯҳи муташаккили ҷиноӣ бо роҳбарии Худойназар Одинаев муайян гардида, ду аъзои он дастгир шудааст.

Тавре аз ВКД ба Озодагон иттилоъ доданд, ин гурӯҳи ҷиноятпеша дар санаи 3-юми марти соли равон дар корхонаи «Обшорон»-и шаҳри Душанбе ба шаҳрвандони ҷумҳурии халқии Хитой ҳамла бурданд, ки дар натиҷа 7 нафар ҷароҳати вазнин бардошт.

 

Бино ба қавли манбаъ ҳангоми гузаронидани чораҳои дастгиркунӣ гумонбаршудагон Рузиқул Шоимқулови 44 сола ва Хуршедҷон Холмуродови 30 сола, сокинони шаҳри Ваҳдат аз паноҳгоҳашон воқеъ дар кӯчаи Алишер Навоии ноҳияи Синои шаҳри Душанбе боздошт гардиданд.

Рӯзи 25-уми март бо гумони даст доштан дар лату куби чиноиҳо 5 нафар дастгир шуда буд. «Аз  рӯи нишондоди дастгиршудаҳо гурӯҳи муташаккилро ҷинояткори махсусан хавфнок Одинаев Худойназар Шарипович, соли таваллудаш 1967, сокини шаҳри Ваҳдат, ки дар содир кардани ҷиноятҳои роҳзанӣ, куштор, ва бандитизм даст дошт, роҳбарӣ мекард. Худойназар Одинаев зимни амалиёти дастгиркунӣ дар хиёбони Синои шаҳри Душанбе, назди бинои Автовокзал норинҷаки дасташро фаъол карда, ба ҳалокат расид»,-афзуд манбаъ.

 

Мӯҳр