«Истиқлол» барои 50 ҳазор доллар мубориза мебарад

Барои Ҷоми раиси Конфедератсияи футболи Осиё (АФК) шаш даста мубориза мебарад.

Тими «Истиқлол»-и Тоҷикистон ҳам, ки дар қисмати муқадамотӣ бо шаш имтиёз дар гурӯҳи худ (С) аввал шуд, муддаии Ҷоми мазкур аст. Аз ин гурӯҳ «Ал-Аммарӣ»-и Фаластин ҳам ба даври баъдӣ роҳхат гирифт. Аз гурӯҳҳои дигар «Дордой»-и Қирғизистон, «Тайван Пауэр»-и Тайван, «Пномпен Краун»-и Камбоҷа ва «Озмоишгоҳи Хон»-и Покистон барои Ҷоми раиси АФК талош мекунанд.

Дастаҳо дар ду гурӯҳ аз 24 то 30-юми сентябри соли 2012 вориди рақобат мешаванд. Ғолибони гурӯҳҳо барои Ҷоми раиси АФК ва 50 ҳазор доллари амрикоӣ мубориза хоҳанд кард. Дастаи дар бозии ниҳоӣ мағлубшуда 25 ҳазор доллар мегирад.

Конфедератсияи футболи Осиё ба шаш кишвари ширкаткунадаи даври ниҳоӣ имкон медиҳад, ки барои мизбонии сабқат талош кунанд. Федератсияи футболи Тоҷикистон рӯзҳои наздик барои мизбонии сабқати ниҳоии Ҷоми АФК-2012 дархост пешниҳод хоҳад кард. 

Мӯҳр