Шаҳрванди Афғонистонро то 20 соли маҳрумият аз озодӣ таҳдид мекунад

Кормандони фаврии Агентии назорати маводи нашъаовари назди президенти Тоҷикистон дар пайи ду амалиёт 17 кило маводи мухаддир кашфу забт кардаанд.

Тавре ба Озодагон  аз агентии мазкур хабар доданд, бо иттиҳоми бо худ нигоҳ доштани ин миқдор маводи мухаддир ду нафарро дастгир кардаанд, ки яке шаҳрванди Тоҷикистон ва дигарӣ табааи Афғонистонанд. «Дар қаламрави ноҳияи Ҳисор шаҳрванди 43 солаи Афғонистон боздошт гардид, ки аз ӯ як халтаи селофанӣ дорои маводи хокамонанд бо бӯи махсус мусодира шуд. Лабораторияи ташхиси судии агентӣ наздик ба 4 кило героин будани онро тайид кард»,-афзуд манбаъ. Сарчашмаи хабар гуфт, дар амалиёти дигар кормандони Агентӣ як сокини ноҳияи Раштро бо ду халтаи селофании дорои 16 баста ҳашиш, ки вазни умумии он 13 кило мебошад, боздошт намуданд. Ин миқдор мухаддирот дар мошини тамғаи «Хундай-STAREX» интиқол дода мешуд.

Аз рӯи ин ҳодисаҳо Шӯъбаи тафтишотии Агентӣ бо моддаи 200, қ.4-и кодекси ҷиноии  Тоҷикистон (муомилоти ғайриқонунии воситаҳои нашъаовар ва ё моддаҳои психотропӣ ба миқдори ниҳоят калон бо мақсади фурӯш) оғоз намуд ва боздоштшудаҳо дар тавқифгоҳи муваққатии Агентӣ нигаҳ дошта мешаванд. Барои муайян намудан ва дастгир кардани гумонбарони дигар чораҳои фаврӣ андешида мешаванд.

Дар сурати исбот шудани гуноҳи гумонбаронро онҳоро аз 12 то 20 соли маҳрумият аз озодӣ интизор аст.

Мӯҳр