Суғд ҳам аз Рӯзи Замин таҷлил кард

Дар маркази вилояти Суғд Рӯзи Заминро бо пайвастан ба ҳаракати умумиҷаҳонии боғҳо ҷашн гирифтанд.

Аз хадамоти матбуотии райиси вилоят ба Озодагон гуфтанд, ки чорабинии мазкур бо ибтикори Раёсати ҳифзи муҳити зист, ташкилотҳои ҷамъиятиву байналхалқӣ, аз ҷумла Гурӯҳи ҷавонон оид ба ҳифзи муҳити зист, Шӯрои ҷанговарони байналмилал ва бо ҷалби ҳаракати «Патрули сабз»-у хонандаҳои мактабҳои миёнаи шаҳри Хуҷанд сурат пазируфт.

«Боғи Ғалабаи маркази вилоят аз партову алафҳои бегона тоза,  бехи дарахтон сафед карда шуда, ниҳолҳои ҳамешасабз шинонда шуд. Инчунин дар боғ қуттиҳои махсуси оҳанӣ  барои партовҳо насб гардид»,-афзуд манбаъ.

Ёдовар мешавем, нахусти маротиба чунин як иқдом бо ташаббуси сенатори амрикоӣ  Гейлорд Нелсон 42 сол қабл роҳандозӣ шуда буд. Ӯ ҳаракати донишҷӯёнро созмон дод. Баъдан, ин иқдом ҳаводорони зиёд пайдо кард ва ҳатто 20-солагии Рӯзи Заминро кӯҳнавардони шӯравӣ, амрикоӣ ва чинӣ бо фатҳи қуллаи Эверест таҷлил карда буданд.

Соли равон низ дар ҳамаи 5 қитъаи ҷаҳон дар беш аз 180 давлати дунё дӯстдорони табиат бо оростани маҳфилҳои мухталиф, озмуну фестивал, раҳпаймоиву гирдиҳамоиҳо Рӯзи Заминро таҷлил карданд.

Мӯҳр