Вазири маориф аз рисолаҳои илмӣ ва мавзӯоти онҳо интиқод кард

Мазмуну мӯҳтавои бархе аз рисолаҳои илмии солҳои ахир дифоъгардида, аз аҳамияти таърихӣ, сиёсӣ ва иқтисодиву иҷтимоӣ бархурдор нестанд.

---

Ин нуктаро Нуриддин Саидов, вазири маориф зимни баргузории ҷаласаи мушовараи ин вазорат иброз дошт. Тавре  Сиддиқ  Муборак, сухангӯи ВМ ба хабаргузории «Озодагон» иттилоъ дод, дар ин нишаст пешниҳоди санадҳои 8 нафар барои гирифтани унвонҳои профессорӣ ва дотсентӣ маъқул дониста шуданд.

Манбаъ афзуд, дар нишаст қайд гардид, ки алъон даҳҳо рисолаи илмӣ роҷеъ ба эҷодиёти кадом олиму адиб рӯи кор меояд, аммо бисёр мавзӯву проблемаҳои ҳалталаб, ки нигарони пажӯҳиш ва рӯшанӣ андохтан буда, ҷомеаи имрӯзии мо ба онҳо ниёз дорад, аз назари пажӯҳишгарон дур мемонад: «Ҳадаф аз кори илмӣ набояд фақат ба даст овардани унвону дараҷаи илмӣ бошад, балки донишмандони моро лозим аст, ки бештар ба мавзӯъҳои актуалӣ, ки то ҳанӯз эҳтиёҷманди омӯзишу таҳқиқанд, рӯй оранд».

Дар мушовара, ҳамчунин гузориши масъулон оид ба вазъи сифати таълиму тарбия дар мактабҳои якҷоя (комкомплектӣ)-и ноҳияҳои Рӯдакӣ, Ваҳдат ва Варзоб, фаъолияти таълимию тарбиявӣ ва хоҷагидориву иқтисодии филиали Донишгоҳи давлатии Москва ба номи М. Ломоносов дар шаҳри Душанбе баррасӣ ва сохтори нави Донишкадаи ҷумҳуриявии такмили ихтисос ва бозомӯзии кормандони соҳаи маориф тасдиқ карда шуд.

 

 

Мӯҳр