05 окт 2017 14:43Тоҷикистон / Иҷтимоӣ / Тема дня

Зафаробод: Шикояти омӯзгорон аз нагирифтани маош

Бархе омӯзгорони Коллеҷи техникии ноҳияи Зафарободи вилояти Суғд мегӯянд, ҳудуди шаш моҳ мешавад, ки музди меҳнати худро аз ҳисоби шартномаи донишҷӯён дастрас накардаанд.

Аббос Ҳакимов, як муаллими ин коллеҷ панҷшанбеи 5 октябр дар суҳбат ба “Озодагон” гуфт, аз моҳи феврал ба ин сӯ маоши худро, ки аз ҳисоби шартномаи донишҷӯён ҷудо мешавад, нагирифтааст. Ӯ афзуд, дар баробари вай чанд омӯзгори дигар ҳам дарёфт накардаанд: “Ба роҳбарияти коллеҷ муроҷиат кардем, гуфтанд, масъалаи ҷудо гардидани маблағ аз Вазорати маориф ва илм тасдиқ нашудааст”.

Мирзо Рамазониев, собиқ омӯзгори Коллеҷи техникии Зафаробод, ки ҳоло дар мактаби миёна дарс мегӯяд, гуфт, маоши 5 моҳаашро нагирифтааст. “Дар коллеҷ нақшаи шартномаи донишҷӯён иҷро шудааст, вале маоши шартномавии моро намедиҳанд. Ҳоло фарзандам дар беморхона аст, пуле надорам, ки барои муолиҷаи вай харҷ кунам”,-афзуд Рамазониев.

Ба гуфтаи ӯ, чан бор аз мудири коллеҷ ва муҳосиб суол кардаанд, ки кай метавонанд маоши худро дастрас намоянд, аммо ҷавоби дақиқ нагирифтаанд: “Пештар ваъда карданд, ки то Иди Истиқол маошатонро пардохт мекунем, аммо ҷашни Истиқолол ҳам гузашту аз маоши мо хабаре нест”.

Амир Урумхоҷаев, муҳосиби Коллеҷи техникии ноҳияи Зафаробод дар суҳбат ба “Озодагон” пардохт нагардидани маоши омӯзгорон аз ҳисоби шартномаи донишҷӯёнро тасдиқ кард. Ӯ гуфт, дар наздиктарин фурсат ин масъала ҳалли худро меёбад: “Мо сметаи иловагӣ тартиб дода, пешниҳод кардем. Он дар Вазорати маориф ва илм тасдиқ шудааст, вале дар Вазорати молия ҳанӯз тасдиқ нашудааст. Дар суратҳисобамон маблағ ҳаст, ҳамин ки сметаи иловагӣ тасдиқи худро ёфт, дигар ягон мушкил нест. Ҳоло ваъда карданд, ки имрӯз ё пагоҳ тасдиқ мекунем”.

Мӯҳр

Хабарҳои монанд: