02 окт 2017 11:07Тоҷикистон / Акс

АКС: Президент дар боғи намунавии ба номи Пешвои Миллат

Эмомалӣ Раҳмон, раисиҷумҳури Тоҷикистон рӯзи якшанбе, 1-уми октябр аз ноҳияи Хуросон боғи намунавии ба номи “Асосгузори сулҳу ваҳдати миллӣ - Пешвои миллат”, ки дар заминҳои хоҷагии “Асадулло” бунёд гардидааст, боздид кард.

Тибқи иттилои дафтари матбуоти раисиҷумҳури Тоҷикистон боғи мазкур 23 феврали соли 2016 дар майдони 160 гектар дар ҳудуди Хоҷагии фермерии “Асадулло” бунёд шуда, дар он беш аз 300 сокини маҳаллӣ соҳиби ҷойи кор гардиданд: “23 феврали соли 2016 дар боғи ба номи “Асосгузори сулҳу ваҳдати миллӣ - Пешвои миллат” бо иштироки Сарвари давлат дарахтони себ ва 4 марти соли 2017 дар 6 гектари ҳамин боғ 3000 адад ниҳоли олу шинонида шуда буд”.

Дар маҷмуъ боғу токзори хоҷагии Асадулло беш аз 2000 гектарро ташкил медиҳад. Дар 5 соли оянда меҳнаткашони хоҷагӣ мақсад доранд боз садҳо гектар боғи нав бунёд намоянд.

Дафтари матбуоти раисиҷумҳур иттилоъ дод, дар боғи мазкур беш аз 10 намуди ангур ва дар ҳазорҳо гектар навъҳои содиротии себ, нок, зардолу, шафтолу, гелос, олу, олуболу, олуча, чормағз, бодом, анҷир, анор, тут, писта, биҳӣ, челон ва лиму ва дарахтони сояафкану ороишӣ шинонда шудааст: “Хоҷагии фермерии “Асадулло” бисёрсоҳа буда, бо дастури Сарвари давлат муҳтарам Эмомалӣ Раҳмон дар ин ҷо парвариши чорво ба роҳ монда шудааст ва кишти зироатҳои гуногуни гандум, ҷав, наску нахуд, зағер, кунҷит, мушунг, картошка, каду ва полезиҳо барои рушди ин соҳа имкони хубро фароҳам овардааст. Ҳамчунин бо дастгирии Пешвои миллат муҳтарам Эмомалӣ Раҳмон ба хоҷагӣ 60 оилаи занбур дастрас карда шуд. Дар ҳудуди хоҷагӣ ду сардхонаи калон бо иқтидорҳои 300 ва 1000 тонна мавҷуд аст. Айни ҳол меҳнаткашони хоҷагии фермерии “Асадулло” ба ҷамъоварии ҳосили олу, себ, челон ва ангур машғул мебошанд ва ба хотири талаф наёфтани ҳосил онро дар сардхонаҳо нигоҳубин менамоянд”.

Эмомалӣ Раҳмон таъкид намудааст, ки дар ноҳияи Хуросон имкон фароҳам аст, ки ба хориҷи кишвар ба ғайр аз меваю сабзавоти тару тоза ва хуштамъ, инчунин маҳсулоти консервашуда содирот гардад.