05 сен 2017 16:33Тоҷикистон / Сиёсат

“Ховар”: СААД Ҳизби наҳзати исломиро ба феҳристи созмонҳои террористӣ ворид кард

Созмони аҳдномаи амнияти дастаҷамъӣ (СААД) Ҳизби фаъолияташ дар Тоҷикистон мамнӯи наҳзати исломиро ба феҳрасти созмонҳои террористӣ ва экстремистӣ шомил кардааст. Дар ин бора хабаргузории давлатии “Ховар” иттилоъ додааст.

Ба иттилои ин хабаргузорӣ, дар ҷаласаи Кумитаи котибони шӯроҳои амнияти давлатҳои узви СААД, ки 8 июни соли 2016 таҳти раёсати Арманистон дар шаҳри Ереван баргузор шуд, ҷонибҳо рӯйхати ташкилотҳоеро, ки дар кишварҳои узви созмон террористӣ ва экстремистӣ эътироф шудаанд, бо қарори дахлдор ба мувофиқа расониданд: “Дар рӯйхати мазкур дар қатори дигар созмонҳои террористии байналмилалӣ, ба монанди “Ал-Қоида”, “ДИИШ”, “Ихвон-ул муслимин”, “Ансоруллоҳ” инчунин Ҳизби наҳзати исломи Тоҷикистон низ таҳти №65 ворид карда шуд”.

Манбаъ меафзояд, “рӯйхати ташкилотҳое, ки террористӣ эътироф гардидаанд, ба мақомоти салоҳиятдори давлатҳои узви СААД имкон медиҳад, то амалиётҳои ҳамоҳангшудаи худро баҳри муайян ва пешгирӣ кардани фаъолияти онҳо дар минтақаи таҳти масъулити СААД имконпазир гардонад”.

Созмони аҳдномаи амнияти дастаҷамъӣ 7 октябри соли 2002 таъсис ёфта, Тоҷикистон, Арманистон, Белорус, Қазоқистон, Қирғизистон ва Русия узвияти онро доранд.

Ҳизби наҳзати исломии Тоҷикистон, ки ягона ҳизби диннии расмӣ ва фаъол дар миқёси кишварҳои пасошуравӣ буд, пас аз исёни муовини собиқи вазири мудофиа Абдуҳалим Назарзода дар сентябри соли 2015 экстремистӣ эълон шуд. Ба дунбол аксари узви Раёсати олии ҳизб боздошт ва ба муҳлатҳои мухталиф зиндонӣ шуданд. Ду муовини раиси ҲНИТ ба ҳабси абад маҳкум шуд. Раиси ҳизб ва садҳо узви он ҳоло дар хориҷи кишвар ба сар мебаранд.

Мӯҳр

Хабарҳои монанд: