01 авг 2017 17:20Тоҷикистон / Сиёсат / Видео / Тема дня

(ВИДЕО) Ато Муҳаммади Нур хостори бозгашти беқайду шарти Дӯстум ба дафтараш шуд

Ато Муҳаммади Нур, волии вилояти Балхи Афғонистон ва яке аз сиёсатмадорони таъсиргузори ин кишвар хостори бозгашти беқайду шарти Абдулрашид Дӯстум, муовини аввали раёсатҷумҳурии Афғонистон ба дафтари кориаш шудааст. Ин дархости оқои Нур имрӯз, 1 август дар шаҳри Мазори Шариф дар нахустин гирдиҳамоии Эътилоф барои наҷоти Афғонистон садо додааст.

Аввалҳои моҳи июл Ато Муҳаммади Нур, Абдулрашид Дустум, Муҳаммад Муҳаққиқ ва Салоҳиддин Рабонӣ дар Туркия аз ташкили Эътилофи наҷоти Афғонистон хабар доданд.

Абдурашид Дӯстум, ки муовини аввали раёсатҷумҳурии Афғонистон ҳаст, баъди расонаӣ шудани қазияи Аҳмад Эшчӣ ва эҷоди мушкилоти дигар бидуни ин ки аз мансаб озод шавад, дигар ба дафтари кораш ҳозир нашуд ва ба Туркия ҳиҷрат кард. Бархе расонаҳои Афғонистон ба нақл аз манобеи наздик ба Дӯстум гузориш доданд, ки фишорҳо бар ӯ рӯз ба рӯз бештар мешавад, то истеъфо бидиҳад ва ба Туркия биравад, аммо вай ин пешниҳодҳоро рад кардааст.

Он замон Рӯло Ғанӣ, ҳамсари раисҷумҳури Афғонистон ба рӯзномаи “Times”-и Лондон гуфта буд, ки генерал Абдурашид Дӯстум, муовини аввали раисҷумҳури ин кишвар дар ҳабси хонагӣ қарор дорад. Бино ба иттилои пойгоҳи хабарии “Ово”, хонум Ғанӣ ба “Times” гуфтааст, “қонун дар мавриди муовини аввали раисҷумҳур иҷро шуда, ҳанӯз дар хонааш аст, вале ба навъе дар зиндони хонагӣ қарор дорад ва дар амал кори расмии давлатӣ анҷом намедиҳад”.

Қазияи Дӯстум баъд аз он дубора вориди ҷомеаи Афғонистон шуд, ки аз сӯйи Аҳмад Эшчӣ аз мухолифони сиёсиаш, муттаҳам ба бадрафтори ҷинсӣ ва одамрабоӣ шуд. Ин масъала ҷанҷолҳо ва мушкилоти бисёреро барои Дӯстум ба бор оварда, ӯро мунзавӣ кардааст. Ҳоло парвандаи иддаоҳои Эшчӣ дар мавриди Дӯстум таҳти баррасӣ қарор дорад.

Мӯҳр

Хабарҳои монанд: