21 июл 2017 13:01Тоҷикистон / Сиёсат

Идомаи суолу ҷавоб бо вазир: Аз ҲНИТ дар феҳрасти “ШОС” то “мусалмон”-шавии қотилон дар маҳбас

Хабаргузории "Озодагон" идомаи суолу ҷавоби хабарнигорон бо Рамазон Раҳимзода, вазири умури дохилии Тоҷикистонро, ки имрӯз, 21-уми июл сурат гирифт, пешниҳоди хонандагон мекунад.

Суол: Хабари “Ховар” дуруст аст, ки ҲНИТ ба феҳрасти гуруҳҳои террористии Созмони ҳамкории Шанхай ворид шудааст?

Вазир: Ин як расмиёт дорад. Расмиёти давлатӣ ва байнидавлатӣ. Дертар ҳам бошад, ҲНИТ-ро ҳамчун ниҳоди террористӣ ба қайд мегиранд. Ниҳоди зиддитеррористии СҲШ ҲНИТ-ро ба феҳрасти террористӣ ворид мекунад.

Суол: Дуруст аст, ки “Ниҳонӣ” тахаллуси шоирии шумост?

Вазир: Бошад! Чаро не? Ҳамаи роҳҳое, ки ба фоидаи ҷамъиятанд, барои нишон додани аҳамияти амнияту тартибот мо аз роҳҳои гуногун истифода мебарем. Шеър ҳам менависем, мақола ҳам менависем.

Суол: Нархи иваз намудани рақами давлатии мошинҳо қимат аст, имкони арзонкунии он нест?

Вазир: Нархи расмии ивази рақами давлатӣ 420 сомонӣ аст, аз ин ягон сомонӣ зиёд надиҳед. Дар мавриди имконият арзонкунӣ, боз супориш медиҳам, ки омӯзед, агар имкон бошад, арзонтар кунед.

Суол: Алайҳи шиканҷа чӣ чора меандешед?

Вазир: Яке аз масъалаҳои мубрам, ки ҳар як рӯз ман дар бораи он гап мезанам, дар ҷаласаҳо, ҳангоми таъиноту барканорӣ таъкид мекунам, ки аз шиканҷа дур шудан даркор. Роҳҳои кушодани ҷиноят зиёд аст. Ман доим таъкид менамоям, ки бигзор ҷиноят нокушода монад, аммо тариқи шиканҷа ҷиноятро бори шаҳрвандон накунед. Шикоятҳо ҳаст дар ин маврид. Аммо баъзан ҷинояткорҳо беасос шикоят мекунад. Худаш одам мекушд, таҷовуз мекунад, аъзои ДИИШ аст, вақте дастгираш мекунем, мегӯяд маро шиканҷа карданд. Муроҷиатҳоро баррасӣ мекунем, аммо бисёри онҳо тасдиқи худашро намеёбанд.

Суол: Таблиғи ифротгароӣ дар маҳбасҳо густурда аст, баъзан ҷавонон бо ҷурми ҷиноятҳои сабук маҳбасӣ мешаванд, аммо он ҷо зери таъсири таблиғоти густурда қарор мегиранду хатарноктар шуда, ба озодӣ мебароянд. Роҳи ҳалли ин мушкилро дар чӣ мебинед?

Вазир: Ин мушкили иҷрои ҷазои ҷиноӣ аст ва он воқеан ҷой дорад. Вобаста ба шароит ва имкониятҳо маҳбасҳо ҷудо карда мешаванд. Баъзан ифротгарою одамкушу таҷовузгар таҳти таъсири таблиғот дар маҳбас гӯиё “мусалмон” мешаванд. Ин ба иродаи суст бастагӣ дорад ва чунин афрод дар куҷое набошанд, таҳти таъсири гуруҳҳо қарор хоҳанд гирифт. Супориши роҳбари давлат аст, ки ин масъалаҳо дида мешаванд.

Суол: Дар масъалаи шиносномагирӣ ва гирифтани шаҳодатномаҳои ронандагӣ миёнаравҳо хеле зиёданд ва ин ба нархи ҳуҷҷатҳо низ таъсир мерасонад. Раёсати амнияти дохилии шумо дар ин самт чӣ кор карда истодааст?

Вазир: Бархе миёнаравҳо аз худи ҳамин амнияти дохилиянд. Рост мегӯям. Набошад, барои чӣ дастгир намекунанд? Ин бахшҳо бо мардум сарукор доранд ва шикоятҳо низ дар ин бора ҳастанд. Ман ҳамеша таъкид мекунам, ки дар доираи қонун амал намоянд, зеро маҳз чунин корҳо обрӯи мақомоти милисаро мерезонанд. Дар ин масъала боз чораандешӣ мекунем.

Мӯҳр

Хабарҳои монанд:

лоик

Чаноби вазир! Чаро шиносномаи хоричиро шахрвандони Киргизистону Узбакистон дар 1 ё 2 руз сохиб мешаванду шахрванди Точикистон то як мох ва хатто зиёд интизор мешавад? Ё шиносномаи хоричии мо дар Мадагаскар чоп мешавад??

Ҷавоб диҳед Иқтибос Шикоят

Шахрванд аз пойтахт

Чаноби Вазир!!! Аз Шумо хихиш менамоем, назоратро аз болои макомоти шиносномадихи пурзур намоед. он кадар бенизомию тамаъкорие, ки дар ин чост....

Ҷавоб диҳед Иқтибос Шикоят

Эзоҳ илова кунед