22 май 2017 09:26Тоҷикистон / Сиёсат / Дидгоҳи хос

Президент: Бекорию камбизоатӣ ба ифротгароию терроризм мусоидат мекунад

Эмомалӣ Раҳмон, раисиҷумҳури Тоҷикистон, 21-уми май дар ҳамоиши сарони кишварҳои олами Ислом ва ИМА дар шаҳри Риёз дар бораи афзоиши тундгароӣ, заминаҳои он, сӯиистифода аз номи Ислом ва таҷрибаи сулҳи тоҷикон суҳбат кардааст.

Тибқи иттилои дафтари матбуоти раисиҷумҳури Тоҷикистон Эмомалӣ Раҳмон изҳор доштааст, ки бар асари мавқеъгирии духӯра нисбат ба хостаҳои ифротиву террористӣ, гурӯҳҳои тундгаро мавриди пуштибонии сиёсиву иттилоотӣ ва молиявии бархе аз бунёдҳову созмонҳои ба ном ҷамъиятӣ ва ҷонибҳои дигар қарор гирифтаанд: “Дар натиҷа терроризм ва ифротгароӣ ҷуғрофияи паҳншавии хешро дар шаклу усулҳои боз ҳам даҳшатноктар васеъ кардаанд. Ҳамчунин, мавриди нигаронист, ки дар ин раванд кӯшишҳои сиёсисозии дини мубини ислом ва сӯиистифода аз номи поки он хусусияти зуҳуроти хатарзоро касб кардааст. Гурӯҳҳои ифротиву террористӣ дар минтақаҳои мухталифи олам хушунат ва задухӯрдҳои хунини мазҳабиву этникиро барангехта, боиси афзоиши исломситезӣ ва пайдоиши бадбинии мусулмонон шудаанд. Дар иртибот ба ин, ман борҳо изҳор доштаам ва боз ҳам таъкид карданиам, ки террористу ифротгаро на ватан ва на миллату мазҳаб дорад”.

Эмомалӣ Раҳмон бо зикри ноамниҳои солҳои 90-уми асри гузашта дар Тоҷикистон гуфтааст, таҷрибаи сулҳи Тоҷикистон бори дигар собит сохт, ки ҳама гуна нерӯҳое, ки барои расидан ба ҳадафҳои ғаразноки хеш аз номи поки ислом сӯиистифода мекунанд, ҳаргиз мавриди пуштибонии ҷомеа қарор нахоҳанд гирифт.

Ба гуфтаи раисиҷумҳури Тоҷикистон истифодаи васеи Интернет бо мақсадҳои ғаразноки таблиғи ғояҳои ифротиву тундгароёна ҷиддан тақозо менамояд, ки мубориза бо ин зуҳуроти хатарзо низ дар ҳамбастагӣ сурат гирад.

Эмомалӣ Раҳмон илова намудааст, ки бекорӣ, камбизоатӣ ва сатҳи пасти ҳифзи иҷтимоии аҳолӣ дар баробари омилҳои алоҳидаи рӯҳиву маънавӣ ба зуҳури тундгароӣ ва терроризм мусоидат менамоянд: “Дар ин замина дастгирии рушди бахшҳои иҷтимоӣ дар кишварҳои рӯ ба тараққӣ амри муҳим ба назар мерасад. Ба андешаи мо, мусоидат ба кишварҳои рӯ ба тараққӣ дар роҳандозии рушди иҷтимоиву иқтисодӣ василаи самарабахши аз байн бурдани заминаҳои тундгароӣ ва таъмини суботи фарогир маҳсуб меёбад”.

Мӯҳр

Хабарҳои монанд:

Шерали

Президенти мо туппа турги мега. Хама бекору камбизоатанд. Дар ин росто хаддиакал маошу нафакаи шахрвандонамонро бардоштан ба манфиати халк аст.

Ҷавоб диҳед Иқтибос Шикоят

Саъид

Дуруст аст, ки холо аксари сиёсатмадорон махсусан рохбарони кишвархо сиёсати духураро рохандози мекунанд! Мисол мераванд дар мачлисхои кишвархои ИСЛОМИ иштирок мекунанд, вале дар кишварошон мусалмонон дар холи табохе карор доран!

Ҷавоб диҳед Иқтибос Шикоят

Эзоҳ илова кунед