04 апр 2017 08:06Тоҷикистон / Иҷтимоӣ / Рӯ ба рӯ

ВАО: Теъдоди қурбониёни таркиши Санкт-Петербург ба 14 нафар расид

Расонаҳои русӣ мегӯянд, дар пайи таркиши истгоҳи метрои шаҳри Санкт-Петербург дар рӯзи гузашта 14 нафар ба ҳалокат расидааст.

“Фонтанка.ру”менависад, 11 нафар дар дохили вагон ва ду тан дар беморхонаи Мариинск ҷон додаанд. Теъдоди захмиёнро беш аз 40 нафар мегӯянд. Сафорати Тоҷикистон дар Русия мегӯяд, миёни қурбониён шаҳрвандони Тоҷикистон нестанд.

Расонаҳо бо такя ба мақомоти пулис акси нафареро нашр карданд, ки дар ин ҳамлаи террористӣ гумонбар мешуд. “Фонтанка”, ки аз аввалинҳо шуда, аксро нашр кард, навишт, ин марди ришдор 20 дақиқа қабл аз таркиш дар қатори метро дар байни истгоҳҳои “Сенная площадь” ва “Технологический институт” дар истгоҳи “Петроградская” вориди метро шудааст. Аммо пойгоҳи хабарии “Интерфакс” хабар дод, ин мард ба идораи пулис ҳозир шуда, гуфтааст, дар ин қазия даст надорад. Дар ҳамин ҳол, ин расона бо такя ба манобеи худ дар ниҳодҳои интизомии Русия навишт, инфиҷор кори як маргталаби 23-сола аз Осиёи Миёна будааст.

Эмомалӣ Раҳмон, раисҷумҳури Тоҷикистон дар робита ба таркиши маргбор дар истгоҳи метрои Санкт-Петербург унвонии ҳамтои русаш барқияи таслият ирсол намудааст.

Бино ба иттилои дафтари матбуоти Президент, дар ин нома аз ҷумла гуфта мешавад, “аз хабари таркиши фоҷиабор дар истгоҳи метрои шаҳри Санкт-Петербург, ки бар асари он шаҳрвандони бегуноҳ талаф ёфтанд, сахт андӯҳгин гардидам. Бо эҳсоси андӯҳ мо ин амали мудҳишро маҳкум намуда, ҳамоҳангии кӯшишҳои худро барои аз байн бурдани хатари даҳшатбори аср - терроризм таъкид менамоем”.

Оқои Раҳмон дар идома аз Владимир Путин хоҳиш кардааст, ҳамдардиашро ба наздикону пайвандони ҳалокшудаҳо бирасонад. “Ба зарардидагони ин фоҷиаи мудҳиш шифои комил орзумандем”,-гуфта мешавад дар барқияи таслият.

Мӯҳр

Хабарҳои монанд: