27 мар 2017 11:06Тоҷикистон / Фарҳангу адаб

“Нигоҳи нав” мардумро аз Рӯзи ҷаҳонии театр ва мушкилиҳои фестивалаш огоҳ мекунад

Созмони “Нигоҳи нав” бо тақсим намудани варақаҳои огоҳӣ дар кӯчаҳо сокинон ва меҳмонони Душанберо аз Рӯзи ҷаҳонии театр, ки ҳамасола 27 март ҷашн гирифта мешавад, огоҳ карданист.

Далери Имомалӣ, як масъули “Нигоҳи нав” ба “Озодагон” гуфт, паҳн кардани варақаҳо соати 10:00-и имрӯз аз назди театрҳои фаъоли шаҳри Душанбе шурӯъ мешавад. Ӯ ҳадафи ин иқдомро ҷалби мардум ба театр унвон кард: “Мо ин корро аз ҳисоби худмон мекунем. Ғайр аз он ки мардум аз ин сана хабардор мешаванд, ҳамчунин мехоҳем баъзе мушкилиҳои марбут ба баргузории марбут ба Ҷашнвораи “Нигоҳи нав”-ро ҳам баён намоем”.

Ба гуфтаи Далер Имомалӣ тибқи нақша шашумин Ҷашнвораи “Нигоҳи нав” имсол бояд аз 16 то 20 май баргузор шавад, аммо бо далели мушкили молӣ эҳтимоли доир нашудани он вуҷуд дорад. Ӯ афзуд, 20 фисади буҷаи баргузории фестивалро Дафтари ҳамкориҳои шветсарӣ пардохт мекунад ва онҳо ба дастгирии ҳукумати кишвар ниёз доранд.

Ин масъули ҷашнвораи “Нигоҳи нав” гуфт, барои иштирок дар ҷашнвораи имсол аз 16 кишвар дархост гирифта ва танҳо 7 гуруҳи ҳунарӣ аз Афғонистон, Эрон, Қазоқистон, Қирғизистон, Узбакистон, Русия ва Гурҷистон иҷозаи ширкатро дарёфт намудаанд: “Комиссияи “Нигоҳи нав” намоишномаҳои дигарро бо далели ба талаботҳои ҷашнвора ҷавобгӯ набудан, қабул накард. Яке аз талаботҳои асосии фестивал, бо сабк ва услуби нав пешниҳод кардани намоишномаҳо мебошад. Ҳамчунин афроди аз 35-сола боло роҳ дода намешаванд, чун талабот ҳамин аст, ки танҳо ҷавонон истеъдоди худро ин ҷо нишон медиҳанд”.

Фестивали “Нигоҳи нав” панҷ соли қабл бо талоши як гуруҳ ҷавонон таъсис ёфта, ду соли ахир мақоми байналмилалиро касб намудааст.

Мӯҳр

Хабарҳои монанд: