14 мар 2017 12:44Тоҷикистон / Дасти хайр / Иҷтимоӣ

Кӯмакхоҳии падари Зайнаб: Табобатро сар кунед, 250 ҳазор рубли дигарро меорам (АКС)

Туйчибек Ибронов, як шаҳрванди Тоҷикистон барои наҷоти духтараш-Зайнаб Иброноваи 7-сола, ки мубталои бемории “лейкоз” шудааст, аз ҳамватанон кӯмак мехоҳад.

Ибронов имрӯз, 14-уми март дар суҳбат бо “Озодагон” гуфт, “аввал дар бадани духтарчаам нуқтаҳои сурх, ранги аллергия пайдо шуд, ки дору додем, соз шуд. Баъди чанд муддат дар таги гулӯяш кулулаҳо пайдо шуданд. Назди духтури гӯшу гӯлу бурдам, гуфт ин бемори мо нест. Рафта хунашро супоридем, ки ҳама хуб буд. Аз он ҷо моро ба шӯъбаи онкологӣ равон карданд, гуфтанд, ки ки дар асл бемории саратон аст. 60-70 дарсад кафолат доданд, ки бемории онкологӣ аст. Табобати кимиёӣ карданд, аммо организми Зайнаб аксуламал нишон дод. Ҳудуди 10 ҳазор сомонӣ барои табобат сарф шуд, аммо беҳбудие ҳосил нагардид”.

Тӯйчибек Ибронов гуфт, ниҳоят тасмим гирифт, ки духтарашро барои табобат ба Русия равон кунад: “Бо кӯмаки ҳамсояҳо пули билетро ҷамъ кардем, айни ҳол Зайнаб ҳамроҳи модараш дар Санкт Петербур аст. Дар он ҷо ташхис гузаронда муайян карданд, ки Зайнаб мубталои бемории “острый лейкоз” аст, ки аз ташхиси гузоштаи табибони тоҷик тамоман фарқ мекунад. Дар беморхонаи “Алмаз” гуфтанд, ки бемориро табобат мекунанд”.

Ба гуфтаи Ибронов масъулини беморхона гуфтаанд, дар марҳилаи аввал барои табобати 40-рӯза бояд пули нақди 450 ҳазор рубл пардохт карда шавад: “То ҳол 200 ҳазор рублро ҷамъ кардем, аммо вазъияти Зайнаб бадтар шудааст. Ман гуфтам, 200 ҳазор рублро гирифта, духтарамро хобонед ва 250 ҳазор рубли боқимондаро пайдо мекунем. Имрӯз ваъда доданд, ки духтарро дар беморхона хобонда, табобатро сар мекунанд. Табибон гуфтанд, марҳила ба марҳила табобати Зайнаб то 2 сол давом мекунад”.

Падари ниёзманд гуфт, охирин умедаш ҳамватанони хайрхоҳашон мебошанд, зеро то ҳозир ба сафоратхонаи Русия, Ҷопон, Олмон ва Вазорати тандурустии Тоҷикистон муроҷиат кардааст, аммо посух гирифтааст, ки чунин хидматрасониро надоранд: “Ба раёсати тандурустии шаҳрӣ ва поликлиника низ муроҷиат кардам. Дар поликлиника байни худашон 200 сомониро ҷамъ карданд ва ба ман доданд, ки миннатдорам. Ҳозир ростӣ худам нони хӯрдан надорам. Дар Русия гуфтам, табобатро шурӯъ кунед, маблағи боқимондаро ҷамъ карда меорем. Кӯмакам кунед...”.

Афроде, ки имкону хоҳиши кӯмак доранд, метавонанд тариқи рақамҳои 93 141 74 09, 900 91 24 26 бо падари Зайнаб ва ё бо рақамҳои +79216414097, +79215530225, +79312579369 бо наздикони Зайнаб, ки дар Русия қарор доранд, дар тамос шаванд, ё ба суратҳисоби зерин маблағ гузаронанд:

АКСЕСБАНК 20218840200000069065 (USD), 20216972100000069064 (TJS)