Пурсиш: Фаъолияти "IRS" дар рӯзҳои барфу тармафароӣ қонеъкунанда буд?
Тоҷикистон дар ҳафтае пеш шоҳиди барфрезӣ ва тармафароиҳои зиёде шуд. Дар пайи фаромадани тарма дар роҳи Душанбе-Хуҷанд даҳҳо мошин зери тарма монд ва то имрӯз аз ҳалокати 10 нафар хабар расидааст. Равуо тавассути ин шоҳроҳ, ки ягона роҳи заминии пайвандгари пойтахти кишвар бо шимоли Тоҷикистон аст, аз чанд соли пеш пулакӣ аст. Ин масъулият бар уҳдаи ширкати IRS аст. Зимнан, “Озодагон” аз чанд соҳибназари тоҷик пурсид: ФАЪОЛИЯТИ "IRS" ДАР РӮЗҲОИ БАРФУ ТАРМАФАРОӢ ҚОНЕЪКУНАНДА БУД?
Асомиддин АТОЕВ, коршиноси фанновариҳои иттилоотӣ
Метарсам, ки андешаам нисбати фаъолияти ширкат воқеъбинона буда наметавонад. Чунки аз моҳи марти 2016 инҷониб бо ин роҳ сафар накардаам. Аз он чӣ дар саҳифаи хабаргузориҳову шабакаҳои иҷтимоӣ хондаам ширкат талош меварзад барои ёрдам расонидан. Барои беҳбудии корашон маркази идораи ҳолатҳои фавқуллодаи муҷаҳҳаз бо технологияҳои муоссир таъсис додаанд. Агар дода бошанд, вусъат додани тавонмандии он ба манфияти кор аст. Масалан истифодаи дронҳо дар чунин ҳолатҳо.
Далери ИМОМАЛӢ, ҳунарманди театр
Дар миёни хамин тарма дӯстони наздикам монданд. Хушбахтона ба саломат баромаданд. Аммо касе дар ин роҳ кафили бехатарии ҷони мардумро намедиҳад. Барои чӣ маблағ гирифта мешавад, вақте дар ҳар 50 км якто ҳоҷатхона нест. Бунгоҳҳои тиббӣ дида намешаванд. Дар чунин рӯзҳои тармафароӣ мо дидем, ки чӣ техникаву чӣ қудрат дорад ин ширкат. Бояд шумори техникаҳои муосири куҳгардияшро зиёд кунад. Ҳоло намедонем товони зарари дидаи мардумро ин ширкат пардохт мекунад ё хайр. Ҳоло бубинем барои ҷони талаф ёфтаи шаҳрвандон, расман роҳбарияти ширкат узрхоҳӣ мекунанд ё хайр. Қимати инсонро ин ширкат ба пул баробар кардааст. Инсоният мафҳуми аслиашро пеши роҳбарони ширкат гум намудааст. Дар симои ҳар мусофир онҳо сомонӣ мебинанд.
Сергей БОБОЕВ, директори техникии филиали ширкати “IRS”
Ибрози назари он ки гӯиё фаъолияти “IRS” мувофиқи матлаб нест, андешаи нафарони аз ҳама кас ва ҳама чиз норозӣ аст. Тавре қаблан иттилоъ дода будем, аз 27 январи соли равон инҷониб бар асари боришоти аз меъёр зиёди барф, аз километри 48 то 73-юми роҳи Душанбе– Чаноқ дар якчанд мавзеъ тармафароӣ ба амал омад, ки рӯзҳои аввал теъдоди тармаҳо зиёда аз 70 адад буда, баландии ҳар кадомаш зиёда аз 10 метрро ташкил дод. Дар робита ба ҳолати мазкур, филфавр зиёда аз 30 техникаи пуриқтидори филиали ширкати “IRS” ба ин масир сафарбар шуданд. Ҷоиз ба зикр аст, ки филиали ширкат дорои пойгоҳи пурқуввати техникӣ буда, теъдоди техникаву механизмҳояш 171–то аст. 30-юми январ низ боришоти шадид ва тармафароӣ идома ёфта, як муддат ҳаракати нақлиётро қатъ намуд. Новобаста аз мушкилоти зиёд, кормандони “IRS” тавонистанд субҳи 31–уми январ роҳро кушоянд ва ҳамон рӯз ҳаракати нақлиёт аз самти Душанбе ба шаҳри Хуҷанд шурӯъ шуд. Нимаи дуюми рӯзи якуми феврал роҳ пурра аз барф тоза шуда, ҳаракати нақлиёт аз ҳарду ҷониб ба роҳ монда шуд. Мутаассифона, рӯзҳои минбаъда – 2- 5-уми феврал боришоти барф ва тармафароӣ аз нав шиддат гирифта, аз километри 48 то 73 (дар 25 километр) зиёда аз 130 тармаи калонҳаҷм фаромад. Аз ин лиҳоз, роҳбарияти филиали ширкат ба хулоса омад, ки ба хотири таъмини амнияти бехатарии мусофирону ронандагон то ба эътидол омадани вазъият ва рафъи тармаҳо ҳаракати нақлиётро муваққатан тариқи роҳи мазкур боздоранд. Шашуми феврал ба шарофати меҳнати пурмаҳсули кормандони филиали Ширкат роҳи мошингарди Душанбе – Чанок аз барфу тарма тоза шуда, ҳаракати нақлиёт имконпазир гардид. Давоми даҳ рӯзи охир, ки боришоти шадиди барф ва тармафароӣ дар масири роҳ падидаи маъмул буд, маҳз бо кумаки “IRS” нақлиёту мусофирони ба мушкил мувоҷеҳшуда аз банди барф озод гардида, рӯзҳои 3-4 –уми феврал ронандагону мусофирон бо маводи хурока таъмин шуданд. Аз ин пас, як муддат ҳаракати воситаҳои нақлиёт дар доираи реҷаи тасдиқнамудаи Вазорати нақлиёт, Вазорати корҳои дохилӣ ва филиали Ширкати саҳомии “Иновейтив Роуд Солюшнз ЛТД” дар Ҷумҳурии Тоҷикистон, ки тибқи он ҳаракат рӯзҳои тоқи моҳ аз самти Хуҷанд ба Душанбе ва ҷуфти моҳ аз шаҳри Душанбе ҷониби Хуҷанд муқаррар шудааст, амалӣ мегардад.
Шодмон ЯТИМ, рӯзноманигор
Аз мушоҳидаи ман, ки бевосита ҳолати кор ва фаромадани тармаро дар ин масир дидам ҳам барои кормандони “IRS” ва ҳам барои мардум ногаҳонӣ буд. Яъне дар ин шабу рӯз пайи ҳам омадани тарма ба гуфтаи худи мусофирон дар солҳои ахир ба чашм нарасида будааст. Баҳои ман ба кори ин ширкат ин аст, ки то ҳол техникаи заруриро барои наҷоти одамон дар ингуна шарот надоранд. Он техникае, ки дар ихтиёрашон аст, танҳо барои тоза кардани барфи дар роҳи мошингард афтида кофӣ асту халос. Дуввум ин ки аксари мардумро худи мусофирони дар роҳ монда халос кардаанд. Саввум, вақте хатари омадани тарма мешавад ҳатто масъулони ҳамин ширкат ба ҷойи ҳодиса саривақт намераванд, чунки аз ҷонашон метарсанд, ки зери тарма намонанд. Воқеан омадани тарма дар чунин бориишот хатарнок аст. Пешниҳод ин аст, ки чунин айвон ё галерияе, ки дар минтақаҳои хатарнок кардаанд зиёд карда шавад. Дигар техника, ҳадал имкон як чархбол бояд дошта бошад, ки дар вақти банд будани роҳ ба ҷои ҳодисаи зери тарма мондани одамон рафта тавонад. Дар дунё боварӣ дорам, ки техника ё воситае бояд бошад, ки одамонро аз зери тармаҳои мисли дарраи Варзоб наҷот дода шавад. Чун ки давлатҳои пешрафтае мисли Тоҷикистон дар шароити куҳӣ зиндагӣ мекунанд ва онҳо барои худ ингуна техникаро кашф кардаанд. Тасаввур кунед одам зери тарма мондааст, телефонӣ бо хонаводааш чанд соат гап мезанад ва ҳеч ниҳоде дар Тоҷикисотон қудрати наҷот додани онро надорад ва ӯ аз сардиву нафастангӣ мемирад. Ин ки ин ширкат роҳро тоза мекунад, вазифааш аст барои ин дар 12 моҳ пул мегирад, ҳарчанд ки дар он ҷо ҳам инсонҳо заҳмат мекашанд.
Ҷамшед САФАРОВ, ронанда
Рӯзҳои тармафароӣ ман аз Душанбе ба самти Хуҷанд ҳаракат мекардам. Дар минтақаи Шаҳристон роҳ хеле вазнин буд, дар чанд ҷо тарма фаромада буд, лекин техникаҳо сари вақт кор карда, ҳамин мушкилиро бартараф карда, мо сиҳату саломат мусофиронро ба манзилҳояшон расонидем. Аммо чанд нафар аз шиносҳои дигарам, ки ба мусофиркашонӣ дар ин роҳ машғуланд, ҳангоми аз Хуҷанд ба Душанбе омаданашон хеле азоб кашидаанд, чун баъзеашон то нақби “Истиқолол” расиданд, аз сабабе, ки роҳ маҳкам буд, аз роҳи худ баргаштаанд. Баъзеи дигараш дар ҳамон сардиҳо то кушодашвии роҳ мунтазир мондаанд.
Бобуршоҳ ҲАФИЗОВ, мусофир
Аз назари ман фаъолияти ин ширкат чандон муассир набуд. Зеро ин ширкат дар баробари пуле, ки аз мардуми кишвар мегирад, ҳамчунин бояд дар ғами ҷони ин мардум низ бошад. Ин ширкат бояд дар мавзеъҳои хатарзо ё дар мавзеъҳои наздик ба онҳо қароргоҳҳои муваққатии кормандон ва васоили роҳтозакунияшро ташкил бидиҳад, ки битавонад дар зудтарин фурсат ба мушкили пешомада расидагӣ кунад. Ё дар ҳамоҳангии таноготанге бо Маркази обу ҳавошиносӣ қарор бигарад ва дар чунин лаҳзаҳои хатарзо барои чанд муддат ҳаракатро дар масирҳои душворгузоар манъ кунад. Ҳарчанд барои чанд соат ҳам манъ кардани ҳаракат ин ширкатро аз даромадҳои ҳангуфт маҳрум мекунад, вале ҷони мардум аз пулаш бояд азизтар бошад.
Аҳлиддин Салимов, хабарнигор
Албатта ин ҳолати фавқулода аст. Ва мутаассифона шаҳрвандони кишвар дар пайи фуруд омадани тарма ҷони худро аз даст доданд. Ин мусибат аст, вақте азизи як хонадон вафот мекунад. Ва идораҳои масъули давлатӣ бояд мушкилиҳоро пешбинӣ мекарданд ва дар паяш чораҷуӣ менамуданд. Ҳамчунин ширкати “IRS”, ки маблағи андак аз ронангадон намегирад, бояд пешгирӣ мекард ва дар ҳолатҳои хавф иҷозаи вуруд ба он минтақаро намедод. Савол ба миён меояд, ки кӣ посухгӯи ҷони ин нафарон мегардад? Идораҳои масъули давлатӣ ё ширкати IRS?
Мӯҳр
Эзоҳ илова кунед
ХАБАРҲОИ ОХИРИН
Баҳси пурзӯр кардани ҳифзи сарҳади Тоҷикистону Афғонистон дар дидори Э.Раҳмон ва ҳайати парлумони Аврупо10:09Оғози фурӯши смартфонҳои iPhone 8 ва iPhone 8 Plus!09:49БО ЗАБОНИ ШЕЪР: Ман зи андешаи турконаи як ҳамватанам метарсам...15:34Чаро ҳукумат ҳамеша ба ТАЛКО имтиёз медиҳад?14:16“Шантаж”-и ҳамсар: Аз ҳаққи модарӣ даст накашӣ расвоят мекунам10:27Баҳси буҷа: Аз қарзи маош то қарзи хориҷӣ11:57Сарвазири Тоҷикистон бо Президенти Узбакистон мулоқот мекунад11:05Ҳимояти СММ аз cарбози тоҷики пайрави “Шоҳидони Яҳво”, ки либоси низомиро рад кард10:38АКС+ВИДЕО. Нахустин анҷумани маъюбони Тоҷикистон дар Душанбе11:51Маҷлис: Аз тағйироти кадрӣ то ваъдаи 80 мансабдор барои пулдиҳӣ аз кисаи худ15:46100 метр дуртар: Тамокукашӣ маҳдудтар шуд13:21Аз парвандаи Маҳмудов то муроҷиати ҷабрдидагони "7 бурҷ": Роҳкиро надорем (ВИДЕО)11:18Пешниҳоди журналисти тоҷик ба раҳбарони кишварҳои ҷаҳон: 2018-ро соли беяроқӣ эълон кунем!09:33Агентии зидди коррупсия гуфт, “Умед-88” ва Вазорати молия аз “Роғун” қарз гирифтаанд08:01Таърихи имрӯз: Мавлуд, ҷашн, санаҳои таърихӣ, дамои ҳаво, бозори арз07:44
АХБОРИ ҶОЛИБ
10:09, 04 ноябр 2017
ТАҚВИМ
| « Ноябр 2024 » | ||||||
|---|---|---|---|---|---|---|
| Душ | Сеш | Чор | Пан | Ҷум | Шан | Якш |
| 1 | 2 | 3 | ||||
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | |
