26 дек 2016 12:24Тоҷикистон / Сиёсат

Эълони фурудгоҳи Душанбе: Парвозҳои "Уральские авиалинии" қатъ нашудаанд

Фурудгоҳи байналмилалии Душанбе иттилоъ дод, ки дар мавриди манъи парвози ҳавопаймоҳои ширкати “Уралские авиалинии” аз мақомоти тоҷик санадеро дарёфт накардааст.

Ҷамила Ҳусейнова, сухангӯи фурудгоҳи байналмилалии Душанбе мегӯяд, тамоми парвозҳои ширкати “Уралские авиалинии” тибқи ҷадвали тасдиқшуда, бе ягон монеа амалӣ гашта истодаанд.

Қаблан “РИА Новости” аз қавли Юсуф Раҳмонов, сардори раёсати авиатсиаи граждании Вазорати нақлиёти Тоҷикистон навишт, парвозҳо аз шаҳрҳои Краснодар, Уфа, Челябинск ва Красноярск ба самти Душанбе тавассути ширкати "Уралские авиалинии" қатъ шудаанд. Ҷаноби Раҳмонов гуфтаст, ин тасмим иқдоми ҷавобӣ ба иҷозаи парвоз дарёфт накардани ширкати “Сомон Эйр” ба минтақаҳои Русия мебошад.

Аммо ширкати “Уралские авиалинии” гуфтааст, аз Тоҷикистон дар мавриди қатъ шудани парвозҳояш номаи расмӣ нагирифтааст.

Дар робита ба қатъи парвозҳо байни ду кишвар сафири Тоҷикистон дар Русия ба Вазорати корҳои хориҷаи Русия “нота” фиристодааст.

Имомуддин Сатторов дар ин “нота” ё ёддошт, ки 23 декабр ирсол шудааст, бандҳое аз қарордоди байни Маскаву Душанбе дар мавриди парвозҳоро ишора намуда, таъкид сохтааст, ки Русия онҳоро нақз кардааст: “Дар “нота” таъкид гардидааст, тарафи Тоҷикистон созишномаи иртиботи ҳавоии миёни ду кишварро нақз накардааст. Баръакс, нишон дода шудааст, ки Вазорати нақлиёти Русия кадом бандҳои ин созишномаро нодида мегирад”.

“Таниш”-и ҳавойӣ миёни Душанбе ва Маскав баъди он оғоз шуд, ки масъалаи парвозҳо аз фурудгоҳи “Жуковский” дар моҳи ноябр ба миён омад. Тоҷикистон барои парвози ҳавопаймоҳои ширкати "Уральские авиалинии" аз ин фурудгоҳ иҷозат надод. Хадамоти авиатсияи граждании Тоҷикистон таносуби парвозҳои ширкатҳои русиягиро дар бозори мусофирбари Тоҷикистон нашр кард, ки бар асоси он қисми бештари бозор дар ихтиёри ширкатҳои русӣ қарор дорад: “Аз ҷумла дар хатсйри Душанбе–Москва–Душанбе аз ҷониби ширкатҳои тоҷикистонӣ - “Сомон Эйр” – 7 парвоз, “Тоҷик Эйр” – 7 парвоз ва аз тарафи ширкати русиягии “Ют Эйр” – 14 парвоз анҷом дода мешаванд. Аз фурудгоҳи Хуҷанд “Сомон Эйр – 3 парвоз, “Тоҷик Эйр” – 4 парвоз ва аз ҷониби ширкати русиягии “Сибирь” 7 парвоз амалӣ мешавад. Аз фурудгоҳи Кӯлоб танҳо ширкатҳои русиягӣ “Уральские авиалиний” - 4 парвоз ва “Сибирь” - 3 парвоз анҷом медиҳанд. Аз фурудгоҳи Қӯрғонтеппа низ ширкати русиягии “ВИМ Авиа” 7 парвоз дар як ҳафта анҷом медиҳад”.

Аммо Русия таҳдид кард, тамоми парвозҳоро ба Тоҷикистон қатъ мекунад ва ба дунбол мақомоти тоҷик барои парвози ҳавопаймоҳи "Уральские авиалинии" ба Душанбе иҷозат доданд. Нахустин ҳавопаймо 22 ноябр ба Душанбе нишаст. Ахиран, Тоҷикистон барои ширкакти “Ямал” иҷозаи парвоз ба шаҳрҳои Душанбе ва Хуҷанд аз фурудгоҳи “Жуковский”-ро надод ва Русия эълон кард, парвози ҳавопаймоҳои “Сомон Эйр” ба чанд минтақаро лағв кардааст. Баъди ин изҳорот, ҷониби Тоҷикистон ба “Уралские авиалинии” иҷозаи парвоз ба Душанберо надоданд. Намояндаҳои Тоҷикистону Русия мегӯянд, гуфтушунидҳо барои ҳалли ин масъала ҳанӯз натиҷае надодаанд.

Мӯҳр

Хабарҳои монанд: