19 дек 2016 10:08Тоҷикистон / Иқтисодӣ / Тема дня

“Тоҷиксодиротбонк” муҳлати баргардонидани амонати муштариёнашро эълон кард

“Тоҷиксодиротбонк” эълон кардааст, аз 3 январи соли 2017 баргардонидани маблағҳои амонатии муштариёнро шурӯъ мекунад.

Бино ба иттилои торнамои бонк, баргардонидани маблағҳои амонатӣ “бо истифода аз имкониятҳои мавҷуда ва тибқи ҷадвали тасдиқшуда” оғоз мешавад. Манбаъ меафзояд, амонатдорон имкон меёбанд, моҳе як бор қисми муайяни маблағҳои амонатии худро бо пули миллӣ ё эквиваленти он бо асъори хориҷӣ дар Сарбонк ва филиалҳо дар муддати то як сол бозпас бигиранд: “Инчунин, Бонк барои тақвият бахшидани раванди бозгардонии маблағҳои амонатии муштариён иқдоми музоядаи фурӯши амволи манқул ва ғайриманқули Бонкро аз қабили, манзил, офис, воситаҳои нақлиёт ва амволи дигар дар пойтахт ва шаҳру ноҳияҳои ҷумҳурӣ эълон менамояд. Иқдоми мазкур муддати ду ҳафта идома ёфта, ҳангоми хариди амвол ба амонатдорони Бонк имтиёз ва бартарӣ дода мешавад. Ин иқдом имкон медиҳад, ки амонатдорон мувофиқи андозаи маблағҳои амонатии худ амволи Бонкро бо истифодаи имтиёзҳо харидорӣ намоянд”.

“Тоҷиксодиротбонк” инчунин хабар медиҳад, ки миқдори муайяни саҳмияҳои худро бо нархи ниҳоӣ ба фурӯш мегузорад, ки иштироки шаҳрвандон дар он озод аст ва дар харидории саҳмияҳо низ имтиёзи авлавият ба амонатдорон ва муштариёни бонк дода мешавад: “Ғайр аз ин, бо ҳар як муштарии Бонк оид ба баргардонидан ё тамдиди муҳлати амонатҳо ва масъалаҳои дигари марбут ба он суҳбатҳои инфиродӣ гузаронида мешавад”.

Торнамо менависад, шурӯъ аз 19 декабри соли равон хатҳои телефонҳои доимофаъол роҳандозӣ мегардад, ки ҳар як муштарӣ метавонад аз ҷойи худ истода бо Бонк тамос гирад ва оид ба навбати худ дар ҷадвали пардохти амонатҳо ва масъалаҳои дигар иттилоъ пайдо намояд.

Эълони муҳлати баргардонидани амонатҳои муштариён дар ҳолест, ки Тоҷиддин Пирзода баъди 7 моҳ дубора ба мақоми раҳбарии “Тоҷиксодиротбонк” баргашт. Бонки миллии Тоҷикистон 18 майи соли равон дар “Тоҷиксодиротбонк” маъмурияти муваққатӣ бо раҳбарии Мирҳаёт Ёқубов таъин карда буд.

“Тоҷиксодиротбонк”, дуюмин бонки калонтарини Тоҷикистон мебошад, ки дороиҳояш 483 миллион доллар баҳогузорӣ шудаанд. Моликони саҳмияҳои “Тоҷиксодиротбонк” 5 ширкат-“Евразия”-58,89%, “Мелодиён”-11,65%, “Эҳсон”-10,99%, “Медиа Плюс”-7,38% ва “Восток”-1,11% мебошад, ки аз инҳо ширкати “Евразия” ба Пирзода марбут дониста мешавад.

Мӯҳр

Хабарҳои монанд: