«Равшан»-и Кӯлоб ҳамоно дар садри ҷадвали мусобиқоти футбол аст

Бозиҳои даври 44-уми сабқати лигаи олии Тоҷикистон миёни дастаҳои футбол ба анҷом расид.

---

Дастаи “Равшан”-и Кӯлоб дар варзишгоҳи “Пахтакор”-и шаҳри Қӯрғонеппа бо тими мизбон “Вахш” ба майдон баромада, бо ҳисоби 2 бар 0 пирӯзӣ ба даст овард. Дар нимаи аввали бозӣ ҳисобро Комрон Саидов боз намуд ва голи дуввумро Исмоил Шонов дар нимаи дуввуми дидор ба ҳадаф расонд. Тими “Истиқлол”-и Душанбе дар варзишгоҳи “Авиатор”-и Пойтахт бо дастаи “Энергетик”-и Душанбе рақобат намуда, бо ҳисоби бузурги 9 бар 0 ғолиб омад. Дар ин бозӣ Фарҳод Тоҳиров се гол зада, хет-трик кард. Юсуф Рабиев ва Фатҳулло Фатҳуллоев 2-голӣ, Нуриддин Давронов ва Александр Кудряшов 1-тӯбӣ ба ҳадаф мерасонанд.

Дар бозии охирин дастаи ССКА “Помир”-и Душанбе дар варзишгоҳи “Фурудгоҳ”-и ноҳияи Бобоҷон Ғафуров бар тими “Парвоз” бо ҳисоби 2 бар 0 ғолиб омад. Ҳар ду голро Комил Саидов (голи дуввум аз ҷаримаи 11-метра) ба ҳадаф расонд. Дастаи “Хуҷанд”-и Хуҷанд бидуни бозӣ бар “Хайр”-и Ваҳдат, ки аз мусобиқот хориҷ шудааст, бо ҳисоби фаннии 3 бар 0 ғолиб дониста шуд. Бозии ин давр миёни дастаҳои “Регар-ТадАЗ”-и Турсунзода ва “Шодмон”-и Ҳисор, ки пешакӣ баргузор шуда ва бо ҳисоби ҳафт бар сифр ба фоидаи дастаи “Регар-ТадАЗ” поён ёфта буд.

Ба ин тартиб, тими “Равшан” мисли пешин бо 89 хол аз 38 бозӣ дар ҷои аввал қарор дорад. Футболбозони ин даста ду бозии охиринро бо “Истиқлол” дар Душанбе ва дар майдони худ анҷом хоҳанд дод.Дастаи “Регар-ТадАЗ” бо 77 хол аз 33 бозӣ дар мақоми дуюм аст. Тими “Истиқлол”, ки аз ҳама камтар, яъне 29 бозӣ кардааст, бо 75 хол дар ҷои севвум мебошад. Мубориза барои унвони қаҳрамонӣ ва медалҳои мусобиқот миёни пешсафон идома хоҳад ёфт.

Бозиҳои мавқуфмондаи мусобиқот рӯзи 1 декабр дар варзишгоҳи “Пахтакор”-и шаҳри Қӯрғонтеппа миёни дастаҳои “Вахш”-у “Истиқлол”; 2 декабр дар варзишгоҳи “Фурудгоҳ”-и ноҳияи Бобоҷон Ғафуров миёни тимҳои “Парвоз” ва “Регар-ТадАЗ” баргузор хоҳанд шуд. Инчунин, 3 декабр ду бозӣ миёни дастаҳои “Хуҷанд”- “Энергетик”, “Истиқлол”- “Вахш”; 6 декабр ССКА “Помир”- “Истиқлол”, “Хуҷанд”- “Регар ТадАЗ” ва 7 декабр “Парвоз”- “Энергетик” баргузор хоҳад шуд.

Мӯҳр