07 окт 2016 12:37Тоҷикистон / Иҷтимоӣ / Рӯ ба рӯ

Ноиби генпрокурор Аҳмадовро дар қатли сардори пулис ва 5 узви оилааш гунаҳкор хонд (ВИДЕО)

Сергей Зайтсев, ноиби прокурори генералии Русия айбнома алайҳи Маҳмадалӣ Аҳмадов, зодаи 23-солаи Тоҷикистон ва се шаҳрванди озаритабори Русияро барои қатли сардори пулиси ноҳияи Сизран ва 5 узви оилааш тасдиқ намудааст.

Тибқи иттилоияи расмии додситонии кулли Русия парванда алайҳи Маҳмадалӣ Аҳмадов, Роман Фаталиев, Ислом Бобоев, Охран Зохрабов бо иттиҳоми роҳзанӣ, куштор ва қасди куштор барои баррасӣ ба суди вилояти Самара ирсол шуд.

Мақомоти Русия Аҳмадовро, ки аз сесолагияш дар ноҳияи Сизрани Самара иқомат дорад, ҳамроҳи се шарики дигари озарияш дар қатли полковник Андрей Гошт ва 5 узви хонаводааш муттаҳам мекунанд. Андрей Гошт собиқ сардори пулиси Сизран ва ноиби сардори ситоди марказии ВКД-и вилояти Самара будааст.

Додситонии кулли Русия мегӯяд, “бар асоси тафтишот шаби 23 ба 24-уми апрели соли равон, Фаталиев, Бобоев, Аҳмадов ва Зохрабов ба хонаи рақами 58-и деҳаи Ивашевкаи ноҳияи Сизран ворид шуда, бо калтакҳо Андрей Гошт, волидон, ҳамсар, ҳамсари бародар ва бародарзодаашро ба қатл расондаанд. Инчунин қасди қатли бародарзодаи дигар-Софя Гошти 7-соларо кардаанд, аммо ӯ зинда монда, бо ҷароҳатҳои вазнин дар беморхона бистарӣ шуда буд. Софя 25-уми май аз беморхона мураххас шуд”.

Манбаъ афзуд, ки муттаҳамон аз хонаи Гошт, кортҳои бонкӣ, телефонҳои мобилӣ ва дигар ашё ба маблағи 193 ҳазор рубл ва 906 рубли нақдро гирифта, фирор намудаанд: “Калтакҳоро дар ҷангал пинҳон намудаанд”.

Дар пайи ин қазия мақомоти Русия Маҳмадалӣ Аҳмадовро мавриди пайгард қарор дода, эълон карданд, ки ӯ ба Тоҷикистон фирор намудааст. Чанд рӯз баъд пулиси Русия хабар дод, ки Аҳмадовро мақомоти Тоҷикистон боздошт ва ба Русия истирдод карданд.

Аммо Вазорати умури дохилии Тоҷикистон гуфт, Маҳмадалӣ Аҳмадов худаш ба Вазорати корҳои дохилии Тоҷикистон ҳозир шуда, иброз доштааст, ки воситаҳои ахбори Русия ӯро дар куштори оилаи Андрей Гошт, корманди мақомоти корҳои дохилии Федератсияи Россия дар вилояти Самара гумонбар донистаанд: “Ӯ таъкид намуд, ки ӯ дар ин ҷинояти вазнин даст надорад ва барои гуфтаҳои худро собит намудан ба Русия бармегардад”.

Вазорати умури дохилии Тоҷикистон афзуд, “бинобар сабаби дар ҷустуҷӯ қарор надоштан ва аз мақомоти Русия ворид нагардидани дархост оиди дастгир кардани Маҳмадалӣ Аҳмадов, ӯ тавассути нақлиёти ҳавоӣ ба Федератсияи Русия баргашт”.