21 сен 2016 12:40Тоҷикистон / Сиёсат / Тема дня

Афғонистон хостори афви Гулбиддин Ҳикматёр аз СММ мешавад

Расонаҳои Афғонистон тафоҳумномаи ҳукумати Афғонистон бо Гулбиддин Ҳикматёр, раиси ҳизби исломӣ ва яке аз чеҳраҳои ҷангсолори ин кишварро нашр кардаанд.

Бар асоси ин тафоҳумнома ҳукумати Афғонистон тавофуқ кардааст, ки дар бадали барқарории оташбас ба Гулбиддин ва дигар раҳбарони ҳизби исломӣ масъунияти қазоӣ медиҳад ва онҳоро аз ҷавобгарии ҷиноӣ озод менамояд. Ҳамчунин дар ин тафоҳумнома омада, ки ҳукумат дар озод кардани зиндониёни ин ҳизб бидуни таъхир иқдом мекунад. Дар баробари ин Ҳизби Гулбиддин Ҳикматиёр тааҳҳуд кардааст, ки тамоми фаъолиятиҳои низомии худро мунҳал мекунад ва асиронашро раҳо менамояд.

Талошҳо барои пайвастани Гулбиддин Ҳикматёрро ба прусаи сулҳ ҳукумати Афғонистон хеле пештар эълон карда буд ва акнун гуфта мешавад дар ҳамин рӯзҳои наздик Ҳикматёр вориди Кобул мешавад.

Тафоҳумнома бо Гулбиддин Ҳикматёр аз се боб ва 24 модда иборат аст ва қарор буд, ки 8 сентябр миёни Шӯрои Олии сулҳи Афғонистон ва ҳайати раҳбарии Ҳизби исломӣ ва баъдан миёни раисҷумҳури Афғонистон Муҳаммад Ашрафғанӣ ва Гулбиддин Ҳикматёр ба имзо бирасад.

Дар ин тафоҳумнома ҳукумати Афғонистон тааҳҳуд кардааст, ки баъди имзо шудани он аз Шӯрои амнияти СММ хостори бартараф кардани тамоми таҳримҳо барои ҳизби Ҳикматёр мешавад.

Ҳамчунин дар бахши дигаре аз ин тафоҳумнома ҳукумати Афғонистон ваъда кардааст, ки тамоми заминаҳо барои фаъолияти сиёсии Ҳизби исломӣ фароҳам мешавад ва ҳизб аз ҳаққи ширкат дар интихоботҳо бархӯрдор мешавад ва намояндаҳои ин ҳизб дар бахшҳои гуногуни ҳукумат гумошта мешаванд.

Дар моддаи дигаре аз ин тафоҳумнома гуфта шудааст, ки “раҳбари Ҳизби исломӣ метавонад ду ва ё се маҳалро дар Кобул барои будубош худ интихоб кунад ва ҳазинаву амнияти он бояд аз сӯйи ҳукумат таъмин шавад”.

Мӯҳр

Хабарҳои монанд: