20 сен 2016 16:34Тоҷикистон / Рӯ ба рӯ

Ҳабси Мавлуда барои қатли ду кӯдаки 1,5-солаи хонаводааш (АКС)

Кормандони милиса Мавлудаи Зиёдулло, сокини 23-солаи шаҳри Истаравшанро боздошт намудаанд, ки дар қатли ду кӯдаки хурдсол, писари хоҳаршӯй ва духтарчаи бародари худ муттаҳам мешавад.

Тавре аз Вазорати умури дохилии Тоҷикистон иттилоъ доданд, ин ду ҷиноят тайи як ҳафта рух додаанд ва асрори ин ҷиноят баъди марги кӯдаки дуюм ифшо шудааст: “Дар ҳар ду ҳолат волидон фарзандони хурдсоли худро муваққатан барои нигаҳбонӣ ба Мавлуда супоридаанд”.

Ба иттилои манбаъ марги хурдсол Шафиев Абубакри якунимсола 29-уми августи соли 2016 дар хонаи бобои модариаш, ки Мавлуда келини ин хонадон аст, ба вуқӯъ пайвастаст: “Пайдо кардани ҷисми беҷони кӯдаки солим, дар дохили гаҳвора ҳарчанд ҳодисаи ғайричашмдошт буд, аммо шубҳаи касе аз наздиконро ба вуҷуд наовард ва бо гумони он, ки ҳалокати хурдсол марги табиист бе хабар додан ба ягон мақомоти ҳифзи ҳуқуқ ӯро ба хок месупоранд”.

Вазорати умури дохилӣ мегӯяд, дар пайи ин қазия 4-уми сентябр дар хусуси бедарак гум шудани хурдсол Бобоева Фотимаи 1,5-сола ба мақомоти милиса ариза ворид шудаст: “Баъди як рӯз ҷасади хурдсол дар дохили ҳуҷра зери курпаҳо дарёфт гардид. Ҳарчанд ин ҳолат шабоҳати ҳодисаи нохуш ва беэҳтиётӣ дошт, дари қулфкарда дар ҷойи ходиса шубҳаовар менамуд. Хурдсол ба Мавлудаи Зиёдулло фарзанди бародар мебошад. Дар ин ҷиноят гумонбаршаванда бо истифода аз курпача роҳи нафаси хурдсолро баста ба ҳалокат расонидааст”.

Манбаъ афзуд, кушодани қабр ва ташхис нишон додааст, ки марги кӯдаки якум низ маҷбурӣ буда, тариқи бастани роҳи нафас кушта шудаст.
Мақомоти умури дохилӣ таъкид мекунанд, ки сабаби даст ба ҷиноят задани Мавлудаи Зиёдулло рӯшан нест ва бо волидони кӯдакони кушташуда низ муноқишае надоштааст. Ба иттилои тафтишот зоҳиран ҳам нуқсе дар саломатии ҷисмонӣ ва равониаш дида намешавад: “Васвосӣ ё ба истилоҳ “маняк” ва доштани ҳиссиёти бадбинӣ нисбати кӯдаконро тафтишот ба гумонбаршаванда нисбат медиҳад. Ҷоизи қайд аст, ки дар рафти тафтишоти пешакӣ хулосаи ташхиси мутахассиси равоншинос гирифта хоҳад шуд. Феълан аз рӯи далелҳои мазкур нисбати Мавлудаи Зиёдулло бо моддаи 104, қисми 2 Кодекси ҷиноятии Ҷумҳурии Тоҷикистон парвандаи ҷиноятӣ оғоз карда шуда, гумонбаршаванда ба ҳабси пешакӣ гирифта шудааст”.