20 сен 2016 10:09Тоҷикистон / Сиёсат / Тема дня

ВКД: 133 узви “ДИИШ” ва 4 шарики Ҳоҷӣ Ҳалим ба Ватан оварда шуданд (АКС)

Рамазон Раҳимзода, вазири умури дохилии Тоҷикистон 19-уми сентябр зимни ҳамоиш дар мавзӯи «Ҷангҷӯёни террористии хориҷӣ: таҳдидҳо ва масъулиятҳо» дар ҳузури намояндагони мақомоти ҳифзи ҳуқуқи 13 кишвари дунё хостори ҳамкории бештару фавритар дар доираи Интерпол шуд.

Тибқи иттилои Вазорати умури дохилӣ ин ҳамоиш дар доираи лоиҳаи «Калкан»-и пулиси байналмилалӣ-“Интерпол” баргузор гардид, ки ҳадаф аз он муборизаи якҷояи кишварҳои минтақаи Осиёи Марказӣ ва Ҷанубӣ бар зидди ҷиноятҳои фаромиллӣ мебошад.

Вазири умури дохилии Тоҷикистон таъкид кардааст, ки ташкилоту гурӯҳҳои хусусияти террористию экстремистидошта, аз қабили «Ал-Қоида», «Ҷундулло», «Ҳаракати исломии Туркистони Шарқӣ», «Ансоруллоҳ», «Толибон», «Давлати исломӣ», «Ҷабҳат-ан-Нусра», «Гурӯҳи 24», ҳаракати динии «Салафия», «Ҳизб-ут-Таҳрир», Ҷамоат-ул-Исломӣ», «Бародарони Мусулмон», «Лашкар-ут-Тайиба», Гурӯҳи исломӣ, ҷамъияти «Таблиғот» ва дигарон кӯшиш доранд, дар як ҷабҳа вазъияти ҷамъиятӣ-сиёсии минтақаро халалдор созанд: “Бинобар ин, кишварҳои минтақа бояд механизми ҳамкориро коркард намоянд, ки он ҳаракат ва интиқоли ҷангҷӯёнро ба минтақаҳое, ки дар он ҷо амалиётҳои ҷангӣ мераванд, пайгирӣ карда тавонад”.

Тибқи иттилои Вазорати умури дохилӣ то ҳол беш аз 150 муттаҳам дар терроризму ифротгароӣ аз Сурия, Ироқ, Русия, Қазоқистон, Туркия ва дигар кишварҳо ба Тоҷикистон баргардонда шуданд, ки аз ин миён 133 нафар узви ДИИШ, 5 узви “Ҷамоати Ансоруллоҳ”, 4 шарики Абдуҳалим Назарзода, собиқ ноиби вазири мудофиаи Тоҷикистон мебошанд.

ВКД афзуд, вохӯрии сатҳи байналмилалӣ дар мавзӯи «Ҷангҷӯёни террористии хориҷӣ: таҳдидҳо ва масъулиятҳо» имрӯз 20-уми сентябр низ идома хоҳад дошт.