20 сен 2016 08:07Тоҷикистон / Иқтисодӣ / Дидгоҳи хос / Тема дня

Туҳфаи Убайдуллоев ба донишҷӯёне, ки ба “маршировка” рафтанд: 9 моҳ ҳаракати ройгон дар автобусу троллейбус

Бар пояи як қарори шаҳрдории Душанбе донишҷӯёне, ки дар Намоиши ҷашнӣ бахшида ба 25-умин солгарди истиқлоли давлатӣ иштирок кардаанд, аз ҳисоби буҷаи шаҳр чиптаҳои истифодаи бемузд мегиранд.

Шавкат Саидов, сухангӯи раиси шаҳри Душанбе мегӯяд, ин қарор 19 сентябр дар ҷаласаи шаҳрдорӣ содир шудааст. Ба гуфтаи ӯ, тавассути чиптаҳои мазкур донишҷӯён давоми 9 моҳ метавонанд аз “нақлиёти мусофиркашонии ҷамъиятии коммуналӣ – автобус ва троллейбус” истифода намоянд.

Маҳмадсаид Убайдуллоев дар ин ҷаласа ҳамчунин ба ҳар нафаре, ки дар баргузории Намоиши ҷашнӣ саҳм гузоштааст, изҳори сипос кардааст: “Дар ин зимн, Маҳмадсаид Убайдуллоев бо таъкиди нақш ва масъулияти беназири аъзои Шӯрои ҳамоҳангсози баргузории Намоиши ҷашнӣ, ба роҳбарони мақомоти ҳифзи ҳуқуқи шаҳр нисбати касбияташон оид ба ҳифзи тартиботи ҷамъиятӣ ва амнияти шаҳрвандон дар баргузории чорабиниҳои оммавӣ изҳори сипос карда, фаъолияти дар ҳамоҳангӣ бо Вазорати маориф ва илми ҷумҳурӣ анҷомдодаи ректорони донишгоҳҳои олӣ ва директорони коллеҷҳои дар пойтахт фаъолияткунандаро дар роҳи таъмини иштироки донишҷӯён ва дар ин равобит бо ғамхориҳо фаро гирифтани ҳар кадоми онҳоро шоистаи таҳсин маънидод кард”.

Бештари донишҷӯёни донишгоҳҳои Душанбе ҳанӯз се моҳ қабл ба тамрин ё “маршировка” даъват шуда буданд. Нуриддин Саид, вазири маориф ва илми Тоҷикистон 11 июл дар нишасти хабарие гуфт, донишҷӯён ба “маршировка”-ю раҳпаймоиҳо ба муноосибати 25-умин солгарди Истиқлол бо фармоиши вазорат ҷалб шудаанд: “Ҷавонону донишҷӯёни мо -пайрави Пешвои Миллат худашон хоҳишманди иштирок дар ҷашни 25-солагии Истиқлолиятанд”.

Вазир таъкид намуда буд, ки иштирокдорон аз ҳисоби махсуси донишгоҳҳо маблағ мегиранд: “Як вақт бо ғизою нӯшокӣ ва инчунин бо нақлиёту хобгоҳҳои ройгон таъмин мешаванд”. Аммо баъдан бархе донишҷӯён шикоят карданд, ки ҳеч маблағ ё ғизою нушокие намегиранд.

Мӯҳр

Хабарҳои монанд: