08 сен 2016 12:06Тоҷикистон / Дидгоҳи хос

Бордюжа: НАТО хоҳони ҷудоию танҳоии Тоҷикистону Русия аст (ВИДЕО)

Николай Бордюжа, дабири кулли Созмони паймони амнияти дастаҷамъӣ, мегӯяд, НАТО мухолифи раванди ҳамгироии кишварҳои узви СПАД мебошад ва мехоҳад ин кишварҳоро монанди Сурия бе иттифоқчӣ гузорад.

Бордюжа зимни нишасти хабарӣ дар Маскав суол гузоштааст, ки “ба фикри шумо чаро НАТО бо СПАД ҳамкорӣ намекунад?” ва худаш посух додааст: “Барои он, ки онҳо намехоҳанд равандҳои ҳамгироиро дастгирӣ кунанд. Мехоҳанд монанди Сурия бошад, ки касе эътироз карда натавонад. Кишварро саркӯб месозанд, аммо касе нест, ки ёрдамаш кунад, зеро иттифоқчӣ надошт. Мехоҳанд чунин шароитро дар мо ҳам ташкил кунанд”.

Ӯ аз ҷанги иттилоотии Ғарб суҳбат карда, афзудааст, ки “ҳамарӯза дурӯғ хоҳанд гуфт ва кори СПАД-ро дар шакли таҳрифшуда инъикос хоҳанд кард. Ҳамааш фаҳмо, ки ин барои чист. Барои он ки Тоҷикистон бо Русия якҷо набошад. Ҳадафи асосияшон вуруди ихтилоф ба иттиҳоди мо мебошад. Мехоҳанд моро ба утоқҳои миллӣ ҷудо кунанд, дар танҳоӣ бароямон шартгузорӣ намоянд”.

Бордюжа мушкили аслиро дар ин муқовимати иттилоотӣ вазъи заифи молии кишварҳои узви СПАД арзёбӣ намуд.

Дабири кулли СПАД дар мавриди вазъи марзи Тоҷикистону Афғонистон гуфт, солҳои охир даргириҳо афзоиш ёфтаанд ва ин ба фаъолшавии гуруҳи нашъаҷаллобу ноустувории субот дар Афғонистон рабт дорад. Ӯ гуфт, феълан барномаи байндавлатиро таҳия доранд, ки дар сурати қабули он кишварҳои узви СПАД барои ташкили инфрасохтори муосири марзӣ ва таҳкими ҳифзи сарҳади Тоҷикистону Афғонистон кӯмак хоҳанд кард: “Дар ин барнома барои таҳкими ҳифзи сарҳади Тоҷикистону Афғонистон ҷудо кардани маблағи муайян пешбинӣ шудааст”.