07 сен 2016 12:56Тоҷикистон / Иқтисодӣ

Tcell-ро Бунёди Оқохон мехарад

Ширкати шведии Telia барои фурӯши 60 дарсади саҳмияҳои худ дар ширкати Tcell ба Бунёди Оқохон оид ба рушди иқтисодӣ (AKFED) ризоият додааст.

Аз ширкати Tcell ба “Озодагон” гуфтанд, AKFED феълан 40 дарсади саҳмияи “Central Asian Telecommunications Development B.V.”, ки соҳиби ширкати ҶСП “Индиго Тоҷикистон” (бренди Tcell) мебошад, дар ихтиёр дорад: “Харидуфурӯш, ки бояд аз ҷониби мақомотҳои танзимкунандаи Ҷумҳурии Тоҷикистон тасдиқ шавад, ба нақша охири соли 2016 ба анҷом расонида шавад”.

Йохан Деннелинд, президант ва директори генералии ширкати Telia мегӯяд, “фурӯши саҳмияамон дар ширкати Tcell бо мақсади мо оиди қоҳиш додани ҳузури худ дар бозори Евразия ва диққати худро бештар ба бозори Аврупо ва кишварҳои Нордик равона сохтан, мувофиқат менамояд. AKFED аз замони таъсиси ширкати Tcell саҳмиядори муҳим ба ҳисоб меравад ва ман бовар дорам, ки AKFED ин ширкатро дар оянда боз ҳам муваффақтар мегардонад”.

Нархи фурӯш дар асоси арзиши ширкати “Индиго Тоҷикистон”, ки 66 миллион доллари ИМА ро ташкил медиҳад, аз он 60% саҳмия, яъне 39 миллион доллари ИМА ба ширкати Telia тааълуқ дорад, ҳисоб карда шудааст: “Нархи мувофиқашудаи фурӯш тақрибан ба мултипликатори чор маротибагии EV/EBITDA ширкати Tcell аз рӯи ҳисоботҳои соли 2015, ки бо қурби асъори чорӣ аз нав ҳисоб карда шудааст, мувофиқат менамояд. Харидуфурӯш ба натиҷаҳои молиявӣ ва қарзи тозаи ширкати Telia маҳдудан таъсир мерасонад”.

17 сентябри соли 2015 ширкати Telia, ки саҳҳоми аслии Tcell мебошад, эълон карда буд, тадриҷан фаъолияти худро дар АвруОсиё қатъ намуда, бештар ба Аврупо рӯ меорад. Ин ширкат ба ҷуз аз Тоҷикистон дар Қазоқистону Узбакистон, Озарбойҷону Молдова ва Гурҷистон фаъолият дорад.

Мӯҳр

Хабарҳои монанд: