Футбол: Регар ТадАз-Гвардия 10:0, Истиқлол- Парвоз 5:0

Шоми дирӯз бозиҳои даври 42-юми сабқати лигаи олии футболи Тоҷикистон ба анҷом расид.

---

Тавре аз ФФТ ба хабаргузории «Озодагон» иттилоъ доданд, ин навбат дастаи “Истиқлол”-и Душанбе дар варзишгоҳи “Авиатор”-и пойтахти бо тими “Парвоз”-и Бобоҷон Ғафуров рақобат намуда бо ҳисоби 5 бар 0 ғолиб омад. Дастаи “Регар-ТадАЗ”-и Турсунзода дар майдони худ тими “Гвардия”-и Душанберо қабул намуда бо ҳисоби калони 10 бар 0 пирӯзӣ ба даст овард.

Дастаи “Хуҷанд”-и Хуҷанд дар меҳмонӣ тими “Шодмон”-и Ҳисорро бо ҳисоби 2:1 мағлуб кард.

Ёдовар мешавем, ки бозии аввали даври 42-юми мусобиқот рӯзи 20-уми ноябр дар варзишгоҳи “Политехникум”-и Душанбе бо бозии дастаҳои ССКА “Помир” ва “Вахш”-и Қӯрғонтеппа шурӯъ шуда буд, ки ин бозӣ бо ҳисоби 1 бар 1 анҷом ёфт. Дар бозии даври 42-юм дастаи меҳмон - “Равшан”-и Кӯлоб ба иллати аз мусобиқот даст кашидани ҳарифаш дастаи  “Хайр”-и Ваҳдат бо ҳисоби техникӣ 3 бар 0 ғолиб дониста шуд.
Дар ҳамин ҳол дар ҷадвали мусобиқа дастаи “Равшан” бо 86 имтиёз аз 37 бозӣ дар ҷои аввал аст, ки ҳамагӣ се бозии дигар дорад. Тими “Регар-ТадАЗ” бо 76 имтиёз аз 32 бозӣ дар зинаи дуюм мебошад. дастаи “Истиқлол”, ки ҳамагӣ 27 бозӣ кардааст, бо 71 имтиёз дар мақоми сеюм қарор дорад.

Манбаъ афзуд, 23-юми ноябр дар варзишгоҳи “Политеникум”-и Душанбе бозии мавқуфмонда миёни дастаҳои ССКА “Помир” - “Вахш” баргузор мешавад. Даври 43-юми мусобиқот рӯзи 25-уми ноябр миёни дастаҳои “Энергетик” - “Шодмон”, “Регар-ТадАЗ” - “Истиқол” доир хоҳад шуд. Рӯзи 26-уми ноябр бозии мавқуфмондаи дастаҳои “Гвардия” ва “Вахш” барпо мегардад.
Бозиҳои даври охирин – 44-ум рӯзи 29-уми ноябр баргузор мешавад: “Парвоз” - ССКА “Помир”, “Энергетик” - “Истиқлол”, “Вахш” - “Равшан”.

Ба иттилои Федератсияи футболи Тоҷикистон рӯзҳои баргузории бозиҳои мавқуфмондаи мусобиқот пас аз машварат бо дастаҳо муайян хоҳад шуд.

Мӯҳр