04 авг 2016 09:03Тоҷикистон / Тема дня

Дастури Президент ба 12 ҳазор сохтмончии “Роғун”: Бо сифати баланд кор кунед

Эмомалӣ Раҳмон, раисиҷумҳури Тоҷикистон имрӯз, 4-уми август барои шиносоӣ бо рафти сохтмон ва суҳбат бо бинокорон ба майдони бунёди нерӯгоҳи “Роғун” рафт.

Тибқи иттилои дафтари матбуоти раисиҷумҳури Тоҷикистон ба Эмомалӣ Раҳмон гузориш дода шуд, ки ба бунёди нерӯгоҳ 12 ҳазор сохтмончӣ шабонарӯзӣ машғул буда, дар ҳамаи қитъаҳои рӯизаминӣ ва зеризаминии неругоҳ 2077 мошину механизм истифода мешаванд: “Зимни боздид аз мавзеи бунёди садди неругоҳ дар дарёи Вахш иттилоъ дода шуд, ки барои бастани маҷрои об 75 миллион куб маводи хокию сангӣ истифода хоҳад шуд. Дар навбати аввал 179 ҳазор куб масолеҳи сохтмонии хокию сангӣ зарур мешавад”.

Манбаъ мегӯяд, Эмомалӣ Раҳмон ба мутахассисоне, ки лоиҳаи бунёди сарбанди неругоҳро амалӣ мекунанд, дастур дод, ки ҳамаи корҳо бо сифати баланд ва ҷавобгӯ ба талаботи меъёрҳои байналмилалӣ амалӣ карда шаванд.

Раисиҷумҳур таъкид намудааст, ки иншооти мазкур бояд асрҳо ба мардуми Тоҷикистон хизмат намояд: “Эмомалӣ Раҳмон дар идомаи боздид ҳамзамон аз биноҳои идораи дарвозаҳои таъмирӣ, асосӣ ва садамавии нақбҳои сохтмонии 1 ва 2, дарвозаҳои таъмирии нақби обқабулкунаки муваққатӣ ва камераи васлгарии нақби обқабулкунаки муваққатӣ дидан намуд. Корҳои сохтмонӣ дар қубурҳои обпартои агрегатҳои 5 ва 6 бошад, бо ҷушу хурӯш идома дорад. Дар ин ҷо мутахассисони ватанию хориҷӣ 70 фисади корҳои нақбканиро ба итмом расонидаанд. Корҳои оҳану бетонӣ низ дар қитъаи сохтмонӣ вусъат меёбад”.

Аввали моҳи равон миёни Тоҷикистон ва «Салини Импреҷило» доир ба лоиҳакашӣ, харид ва сохтмони иншооти НБО “Роғун” ба маблағи 3,9 миллиард доллари ИМА шартномаи ҳамкорӣ ба имзо расид.

Нерӯгоҳи барқии обии Роғун, ки Эмомалӣ Раҳмон, раисиҷумҳури Тоҷикистон онро масъалаи “ҳаёту мамоти” кишвар хондааст, дар сурати бунёд бо иқтидори 3600 мегават ва садди 335 метрӣ, бузургтарин нерӯгоҳ дар Осиёи Марказӣ хоҳад шуд ва Тоҷикистонро аз як кишвари муҳтоҷи нерӯи барқ ба содиркунандаи он табдил хоҳад дод. Давлати Тоҷикистон борҳо таъкид кардааст, ки иддаои зарари "Роғун" асосе надоранд, зеро об дар садди нерӯгоҳ ба тадриҷ ва дар муддати бештар аз як даҳсола ҷамъ гардида, ба манфиати ҳамаи кишварҳои минтақа истифода хоҳад буд.

Мӯҳр

Хабарҳои монанд: