Низомиёни артиши Асад ба тарафи мардуми эътирозгар мегузаранд

Бар пояи иттилои хабаргузориҳо аз ин кишвар, аз замони оғози эътирозоти мардумӣ барои аввалин бор аст, ки «Артиши озоди Сурия» ба сурати мусаллаҳона ба як маркази амниятии вобаста ба режими Башшор Асад юриш бурдаанд. Афроди «Артиши озоди Сурия»  бо мушаки RPG ва ракетаву пулемётҳо ба муҷтамаи Созмони амниятии ҳукумати Башшор Асад дар канори ҷодаи Димишқ-Ҳалаб ҳамла бурда, дар натиҷа даргирии сахт бо пайомади куштаву захмӣ шудани даҳҳо тан ба вуқӯъ пайваст, ки ба сабаби мамнӯъ будани вуруди хабарнигорон ба ин минтақа теъдоди мушаххаси ҳалокшудагон номаълум боқӣ мондааст.

Зикр мегардад, ки ҳар рӯз пайи ҳам даҳҳо низомӣ аз саффи қувваҳои мусаллаҳи давлат хориҷ шуда, бо эътирозгарон мепайванданд. Созмонҳои ҳуқуқи башар ва мухолифони режими Башшор Асад мегӯянд: аз замони шурӯъи эътирозоти густардаи мардум дар моҳи марти ҳамин сол, неруҳои содиқ ба Башшор Асад дастикам 4000 шаҳрванди осоиштаро  куштаанд.