01 июн 2016 16:38Тоҷикистон / Сиёсат / Рӯ ба рӯ / Дидгоҳи хос

Бузургсолии кӯдаки тоҷик ва волидони вайберӣ

Сайф Сафар

Тоҷикистон “Рӯзи ҷаҳонии кӯдак”-ро мисли чандин “рӯзҳои ҷаҳонӣ”-и дигар ҷашн мегирад, ки ба назарам бар пояи вазъи мавҷуди ин қишри ҷомеа як миқдор таноқуз эҷод мекунад. Ҳудуди 70 дарсади ҷамъияти Тоҷикистон дар деҳот ба сар мебарад, ки худ гӯёи вазъи кӯдакони ин ҷуғрофиё аст. Хусусан замоне, ки суҳбат аз стандартҳои ҷаҳонии шароити зиндагии як кӯдак мекунем; пушти сар кардани бебарқии чандмоҳаи ҳарсола, таҳсил дар мактабҳои камкайфият, ҷалб шудан ба корҳои сангин, ки бар пояи қавонини байналмилал писандида нест.

Дар шаҳр, табиист, ки вазъи кӯдакон аз русто бамаротиб фарқ мекунад, аммо теъдоди қобили таваҷҷуҳ дучори шароити нохубанд. Гирифта аз плостикфурӯшӣ дар бозорҳо, носфурӯшӣ дар сари роҳҳо, дастёрӣ ба ронандаи мусофиркашҳо ё худ пулчинак то шуғлҳои дигар, ки як кӯдак бояд аз он дар канор ва фарогири таҳсил бошад. Аз ин рӯ, метавон “Рӯзи ҷаҳонии кӯдак”-ро дар Тоҷикистон “Рӯзи нигаронии кӯдак” гуфт.

Ай кош, мушкили кӯдаки тоҷик бо шумурдани мушкилоти боло хулоса мешуд, ки дохилиянд ва рӯзе ҳал мешуданд. Аммо, ин қишри ҷомеа даргири масоили печидатаре аст. Муҳоҷират яке аз онҳост, ки касе тавони нарм кардани дасту панҷа бо онро надорад. Намунаҳои бешумор дорем, ки дидори аввалини падару фарзанд дар вайбер сурат мегирад ва гоҳо ҳам иттифоқ меуфтад, ки он падар пас аз 4-5 сол ба дидори фарзанд мерасаду боз бармегардад. Ин вазъ, метавон гуфт, кӯдаки бенасиб аз меҳри падар ё парандаи маҳрум аз як болро ба намоиш мегузорад, ки саранҷом ба нокуҷо мерасад. Муҳоҷират бахши дигаре аз кӯдакони тоҷикро гирифтори асолатбохтагӣ, беҳуввиятӣ ва беморӣ ва маргумир ҳам мекунад, ки зарбаи муҳлик бар камари бемори миллат аст. Намунаи боризи қурбони муҳоҷират Умаралӣ Назаров, кӯдаки панҷмоҳаи тоҷик аст, ки соли гузашта дар пайи боздошти модараш дар беморхона ҷон дод.

Гузашта аз ин кӯдаки тоҷик, ки як маъсум ва аммо фардо як масъул ва тарбияткунандаи насли дигар аст, дар вазъияти носолими воқеъиятҳои рӯз бузург мешавад. Ӯро аз таввалудхона, ки дар дараш навиштаи “Таввалуд ройгон аст” бо пардохти пуле, ки набояд пардохта шавад, “мехаранд”. Ӯро ба кӯдакистоне мебаранд, ки гоҳу бегоҳ ба волидайнаш аз “пули собун” ва “пули ҷорӯб” пайём мерасонад. Баъдаш ҳам по ба мактабе мегузорад, ки ин “пул”-ҳо онҷо ҳам ҷойи по доранд. Ба ин тартиб, бо вуруд шудан ба донишгоҳ аз тариқи Маркази миллии тестӣ, ки ба бовари раиси Маҷлиси намояндагон мардум ҳанӯз ба он боварии комил надоранд, бо кӯдакияш худоҳофизӣ мекунад.

Мартин Лютер, раҳбари Ҷунбиши мадании амрикоиҳои африқоитабор дар бахше аз суханронии маъруфаш “Рӯёе дорам” гуфтааст: “Рӯёи ман ин аст, ки рӯзе чаҳор фарзанди кӯчакам дар кишваре зиндагӣ хоҳанд кард, ки онҳоро на ба сабаби ранги пӯст, балки бо дарунмояи шахсиашон қазоват мекунанд.”

Пас рӯё чизе набудааст, ки амалӣ нашавад ва они мо ҳам ин аст, ки тамоми атфоли тоҷик кӯдакии мамлӯ аз сурур дошта бошанд ва дар канори волидайни худ бар камол бирасад. Рӯзи ҷаҳонии кӯдак муборак бод!

Мӯҳр

Хабарҳои монанд:

Alexandr

Аввал салом ба хабарнигорони ОЗОДАГОН хамеша зиндаву озоду озоднавис бошед. Хар руз маколахои шуморо мехонам ва лазат мебарам. Шумо хамеша озод астед чун базеъ нависандагону рузноманигорони лаганбардор нестед. Дар фикри бехбудии халку ватанед. Хакикат ва бадбахтихои миллатро хамеша руи чоп меоред, ки хондану шуниданаш барои хукуматдорон талх аст. Дар Точикистон гайр аз кудакони онхо дигарон хамма хору зоран. Дар чамеъи мо шохиди хол астам,ки кудакон чунин зиндаги ва хакикати ин холро доранд. Ахсан бародар саломат бош.Дастат дард накунад.

Ҷавоб диҳед Иқтибос Шикоят

Хуршед

зинда бошӣ, бародар. Забони навиштаат ба форсии меъёр наздик аст. Ба дӯстони дигар ҳам кумак кун то бо забони хуб ва дуруст бинависанд ки вақте бо хатти форсӣ ҳам дар сойти шумо чоп мешавад пеши 150 000 000 ҳамзабони дигар хиҷолат накашем. Агар форсии меъёрро хуб баладед нестед, эълом бидиҳед даҳҳо тоҷике ҳаст ки забон ва хаттро ъолӣ медонад. Аз онќо ҳам истифода кунед.

Мавзуъ ва моҳияти навишта ҳам қобили таваҷҷуҳ ва ҷолиб буд. Муваффақ бошед.

Ҷавоб диҳед Иқтибос Шикоят

Эзоҳ илова кунед