20 май 2016 09:42Тоҷикистон / Сиёсат

Ваъдаи Наришкин ба Зуҳуров: Гунаҳкорони ҳодисаи "Хованское” ҷазои муносиб хоҳанд гирифт

Шукурҷон Зуҳуров, раиси Маҷлиси намояндагон, палатаи поёнии парлумони Тоҷикистон имрӯз, 20 май дар мулоқот бо Сергей Наришкин, раиси Думаи давлатии Русия қазияи қабристони Хованскоеи Маскавро ба миён гузошта, аз ҳамтои русаш тақозои расидагӣ барои ҳалли мунсифонаи онро кардааст.

Муҳаммадато Султонов, сухангӯи Маҷлиси намояндагон ба “Озодагон” гуфт, Зуҳуров ба Наришкин гуфтааст, ба ҷинояткорону шахсони пушти ин ҳодиса қарордошта мувофиқи амалашон ҷазо дода шавад. Раиси палатаи поёнии парлумони Тоҷикистон таъкид кардааст, фаъолияти муғризонаи чунин гуруҳҳо наметавонад, рӯи сатрҳои муносиботи хуби Тоҷикистону Русия хатти сурх кашанд.

Раиси Маҷлиси намояндагон иброз доштааст, теъдоди муҳоҷирони кории тоҷик нисбат ба дигар кишварҳо дар қаламрави Русия зиёдтар мебошад ва ин шаҳодат медиҳад, ки тоҷикон кишвари Русияро нисбат ба дигар мамлакатҳо барои худ наздиктар ва ҳатто ватани дуввум медонанд: “Аммо мутаассифона, баъзан ҳолатҳое ба вуқӯъ мепайванданд, ки боиси ба ҳалокат расидан ва ё ҷароҳат бардоштани муҳоҷирони тоҷик мегарданд. Махсусан, ҳодисаи чанд рӯзи пеш, ки дар қабристони Хованскоеи шаҳри Маскав ба вуқӯъ пайваст, сабабгори ба ҳалокат расидани се шаҳрвади Тоҷикистон ва ҷароҳат бардоштани чанд нафари дигар гардид. Чунин ҳодиса боиси нигаронии ҷониби Тоҷикистон шуд”.

Ба иттилои манбаъ Сергей Наришкин аз ҳодисаи қабристони Хованскоеи шаҳри Маскав ва ба ҳалокат расидани се шаҳрванди Тоҷикистон изҳори таассуф намуда, аз Шукурҷон Зуҳуров дархост намуд, ки ҳамдардии ӯ ва намояндагони парлумони кишварашро ба хонаводаҳои марҳумон расонад. Мавсуф таъкидааст, ки ба қазияи мазкур ҳатман дар доираи қонунҳои амалкунандаи Русия расидагӣ хоҳад шуд ва гунаҳкорони ин ҳодиса ҷазои муносиб хоҳанд гирифт.

Сергей Наришкин таъкид доштааст, ки онҳо ҳамеша хостори муносиботи неку равобити ҳасана бо шарики стратегии кишвари худ дар минтақаи Осиёи миёна – Тоҷикистон ҳастанд ва талош менамоянд, ки ин равобит бештар тақвият ёбад.

Дар пайи ҳамлаи як гуруҳи мусаллаҳ ба муҳоҷирони меҳнатӣ дар қабристони Хованскоеи Маскав дар рӯзи 14 май 3 шаҳрванди Тоҷикистон кушта, даҳҳо нафари дигар маҷруҳ шуданд.

Мӯҳр

Хабарҳои монанд: