Ҳабси думоҳаи мудири қабристон, муттаҳам дар ташкили ҳамла ба тоҷикон

Додгоҳи Пресненскийи Маскав имрӯз, 19-уми май қарор кард, ки Юрий Чабуев, раҳбари қабристони “Хованское” барои ду моҳ, то 14-уми июл ба ҳабси пешакӣ гирифта шавад.

Тибқи иттилои мақомоти тафтишотӣ Чабуев ташкилкунандаи асосии ҳамла хунин ба муҳоҷирони меҳнатӣ дар қабристони Хованское мебошад. Бар асоси тафтишот маҳз Чабуев муштзӯрҳои чечену доғистониро алайҳи муҳоҷирони меҳнатии тоҷик равона кардааст. Дар мурофиа барои ҳабси пешакии Чабуев, муффатишон ба додрас аксҳои раиси қабристонро дар лаҳзаи муноқиша пешниҳод кардаанд. Инчунин ба додрас шоҳидии маъмурини пулис ироа гардидааст, ки тибқи он Чабуев ба пулисҳо гуфтааст, барои рондани муҳоҷирони тоҷик аз қабристон чеченҳоро даъват кардааст.

Қаблан додрас дархости ҳабси пешакии Чабуевро барои камбуди далелҳо қонеъ накард. Худи Чабуев гуноҳашро рад карда, изҳор дошта буд, ки талош намуд то ба пулис хабар диҳаду муноқишаро ҷилавгирӣ намояд.

Чанд рӯз қабл додгоҳи додгоҳи ноҳияи Пресненскийи Маскав барои ҳамлаи маргбор ба муҳоҷирони меҳнатии тоҷик Александр Мережко, Артуре Хаҷиханов, Элихан Яҳёев, Никита Мошенко, собиқ корманди пулиси Маскав, Александр Бочарников, ҳуқуқшиноси ширкати “Техэнергосервис”, Вячеслав Серов, сокини бекори 32-солаи Маскав, бародарон-Маирбеку Элбек Вадуевҳо, Зелимхон Хамзатхонов, Борис Рудаков, Сергей Козлов ва Владимир Колесников ва Лечий Яҳёев, зодаи Чеченистонро ба ҳабси пешакӣ гирифт.

Мақомоти тафтишоти Русия мегӯянд, афроди зикршуда вобаста ба нақшашон дар занозании Хованское дар куштори зиёда аз ду нафар, авбошӣ, нигоҳдории ғайриқонунии силоҳ ва ғайра айбдор мешаванд.

Муноқишаи маргбор дар Хованское 14 май дар пайи ҳамлаи муштзӯрҳои Русия, аз ҷумла чечену доғистониҳо ба коргарони тоҷики қабристон рух дод, ки дар натиҷа се тоҷик кушта ва беш аз 20 нафари дигар маҷруҳ шуданд. Эмомалӣ Раҳмон, раисиҷумҳури Тоҷикистон низ ба ин қазия дахолат карда, ба Рамазон Раҳимзода, вазири умури дохилӣ дастур додааст, то таҳқиқи онро пайгирӣ кунад. Мӯҳр