14 май 2016 12:14Тоҷикистон / Иҷтимоӣ / Рӯ ба рӯ

Зарари 2700 хона ва ҳушдори Кумита: Хатари офатҳо ҳанӯз боқист

Муҳаммадҷон Салимзода, муовини раиси Кумитаи ҳолатҳои фавқулоддаи Тоҷикистон, имрӯз, 14 май бо баргузории як нишасти хабарӣ вазъ дар кишварро мураккаб унвон карда, афзуд, ки хатари сар задани офатҳои табиӣ дар ҳамаи минтақаҳои кишвар боқӣ мондааст.

Салимзода изҳор дошт, ки дар маҳаллаҳои нисбатан хатарзо дидбонгоҳҳо ва навбатдории шабонарӯзиро роҳандозӣ кардаанд, то мардумро аз ҳолатҳои селу обхезӣ огоҳ кунанд.

Тибқи иттилои Кумита аз 15 то 18 май боришоти зиёд, шамолҳои сахт, баланд шудани сатҳи об дар дарёҳо, бориши жола ва раъду барқ дар назар аст, ки метавонанд боиси канда шудани хатҳои неруи барқ, хароб гардидани боми хонаҳои истиқоматӣ ва иншооти иҷтимоӣ, фаромадани ярч, сангрезиҳо ва афтидани дарахтон гарданд. Ин ниҳод аз шаҳрвандон хоҳиш кардааст, ки ҳангоми анҷом додани корҳои хоҷагидорӣ ва чаронидани чорво ҳушёр бошанд.

Кумитаи ҳолатҳои фавқулоддаи Тоҷикистон мегӯяд, бар асоси иттилои аввалия то ҳол дар ноҳияи Панҷакент ба 147 хона об даромада, 6 хона пурра 4 хона қисман хароб шудаанд: “Дар ноҳияи Айнӣ ва Панҷакент се нафар ба ҳалокат расида, 7 трансформатор, 27 километр роҳи автомобилгард, 603 гектар замини кишт, 1 86 сар чорво нобуд шудаанд”.

Манбаъ афзуд, дар ноҳияи Рӯдакӣ ҳудуди 2,5 ҳазор хона зери об мондаанд, ки аз ин 6 хона пурра ва 300 хона қисман хароб шудаанд.

Кумитаи ҳолатҳои фавқулоддаи Тоҷикистон илова намуд, ки аҳолиро ба ҷои бехавф кӯчонда, бо се вақт ғизои гарм таъмин карда истодаанд. Ин ниҳод афзуд, ки барои кӯмак ба зарардидагон ва бартарафсозии оқибати офатҳои табиӣ ба созмонҳои байналмилалӣ муроҷиат кардаанд.

Мӯҳр

Хабарҳои монанд: