29 мар 2016 09:07Тоҷикистон / Сиёсат / Дидгоҳи хос / Тема дня

Як моҳ муҳлати раиси шаҳри Душанбе ба муовинаш, “Душанбенақлиёт-хадамотрасон ва...

Маҳмадсаид Убайдуллоев, раиси шаҳри Душанбе аз фаъолияти хатсайрҳои ғайриқонунӣ ва таваққуфи стихиявии воситаҳои нақлиёти ҷамъиятӣ дар назди истгоҳу гузаргоҳҳои зеризаминии серодам изҳори нигаронӣ кардааст.

Бино ба иттилои дафтари матбуоти шаҳрдор, ҷаноби Убайдуллоев дар ҷаласаи рӯзи душанбеи 28 марти худ, ба дунболи нигаронӣ аз масоили марбут ба нақлиёт, фаъолияти анҷомдодаи муовини соҳавиаш, Муассисаи давлатии коммуналии “Душанбенақлиёт-хадамотрасон”, Раёсати Хадамоти давлатии назорат ва танзим дар соҳаи нақлиёт дар шаҳри Душанбе, Бозрасии давлатии автомобилии шаҳри Душанберо ғайриқаноатбахш арзёбӣ карда, барои ислоҳи вазъ ба масъулин як моҳ муҳлат додааст: “Дар зимн, Комиссияи доимии Маҷлиси вакилони халқи шаҳри Душанбе оид ба нақлиёт, коммуникатсия ва беҳдошти роҳҳоро муваззаф намуд, ки назорати қатъию мунсифонаи худро оиди ба танзим даровардани хизматрасонии воситаҳои нақлиёти ҷамъиятӣ ва ҳимояи ҳуқуқи истеъмолкунандагон муттасил ба роҳ монда, ҷиҳати ислоҳи вазъ бо қабули қарорҳои дахлдор, моҳе як маротиба унвонии Раиси шаҳр маълумот манзур намояд”.

Манбаъ меафзояд, дар ҷаласа Маҳмадсаид Убайдуллоев ҳамчунин масъулини шаҳрдориро вазифадор кардааст, ҷиҳати пешгирии пайвастаю пайгиронаи амалҳои коррупсионӣ дар тамоми соҳаҳои фаъолият ва хизматрасонӣ чораҳои қатъӣ андешида, нисбати интизоми меҳнат ва баррасии саривақтии муроҷиати шаҳрвандон бо ҳисси масъулияти баланд муносибат намоянд: “Дар ин росто, ба раисони ноҳияҳо дастур гардид, ки нисбати вусъати корҳои азнавсозӣ ва таъмири роҳҳо дар шаҳр, бахусус ҷалби васеи аҳли ҷамоатчигӣ дар ободонии роҳҳои пиёдагарду мошинрави дохили маҳаллаю шаҳракҳо, намои берунаи биноҳои истиқоматӣ, беҳдошти вазъи санитарию эпидемиологӣ тадбирҳои судманди оммавиро роҳандозӣ намуда, иҷроиши барномаи насби камераҳои мушоҳидавиро дар нуқтаҳои партовҷамъкунии ҳудуди шаҳраку маҳаллаҳо таъмин созанд”.

Мӯҳр

Хабарҳои монанд: